Қарағанды қалалық «Қазыбек би» мешітінің ұстазы Гүлнар Кидирманованың ұйымдастыруымен әйел-қыздар жамағаты арасында садақ атудан сайыс өтті.

Игі бастаманың мақсаты — дін мен дәстүрдің сабақтастығын дәріптеу, ұлттық спорт түрлерін жаңғырту, сондай-ақ әйел-қыздар жамағатының белсенділігін арттырып, саламатты өмір салтын насихаттау.

Сайыс барысында қатысушылар садақ ату өнеріндегі шеберліктерін көрсетіп, мергендік, сабырлылық пен табандылық сынды қасиеттерін ұштай білді. Қазақ халқының дәстүрлі ойындарының бірі саналатын садақ ату — батырлық пен төзімділікті талап ететін ұлттық спорт түрі.

— Ислам діні де, қазақтың ұлттық салты да денсаулықты күтуге, саламатты өмір салтын ұстануға үндейді. Әсіресе садақ ату секілді дәстүрлі ойындар жастарды рухани және физикалық тұрғыдан шыңдайды. Мұндай іс-шаралар әйел-қыздар жамағатының белсенділігін арттырып, имандылықпен ұштасқан ұлттық тәрбиенің жарқын үлгісі болып саналады, — деді ұстаз Гүлнар Кидирманова.

ҚМДБ Қарағанды облысы өкілдігінің баспасөз қызметі