Қарағанды қаласындағы «Әл Машани» мешітінде әйел-қыздар жамағатына арналған уағыз-насихат ұйымдастырылды. Рухани жиында Гүлнұр Қаныбекқызы «шүкіршілік – мұсылманның сипаты» тақырыбында уағыз айтты.

Уағыз барысында Құран аяттарынан мысал келтіріліп, шүкіршіліктің пенде өміріндегі орны мен маңызы түсіндірілді. Алла Тағала «Нәхл» сүресінің 53-аятында:

{ وَمَا بِكُم مِّن نِّعْمَةٍ فَمِنَ اللّهِ }
«Сендердегі әрбір нығмет – сөзсіз Алладан» – деп баян етеді.

Жаратушы Иеміз адамдарға сан алуан нығмет пен рызық беріп, оларды ең абзал жаратылыс еткен. Сондықтан шүкіршілік ету – мұсылманның қасиетті міндеті.

Сондай-ақ «Ағраф» сүресінің 58-аятында былай делінген:

«Жақсы (құнарлы) жерден өсімдік Раббысының рұқсатымен көктейді. Ал жаман (құнарсыз) жерден мардымсыз ғана өнім шығады. Біз аяттарымызды шүкір етуші қауымға осылайша баян етеміз».

Осы аяттар арқылы Алла Тағала шүкіршілік етудің берекеге жеткізетінін, ал шүкірсіздік нығметтің кемуіне себеп болатынын ескертеді.

Сондықтан шүкіршілік мұсылманның бойынан табылуы тиіс сипат ретінде әрбір ісінде көрініс тауып, Алланың разылығына жетелейтіні аталып өтті.

Уағыз соңында қатысушы жамағат тақырыпқа байланысты сұрақтар қойып, өзара пікір алмасты.

ҚМДБ Қарағанды облысы өкілдігінің баспасөз қызметі