Қарағанды қалалық «Қазыбек би» мешітінде дәстүрлі түрде өткізіліп келе жатқан бейсенбілік рухани кеш барысында жамағатқа «Сырға толы салауат» тақырыбында уағыз-насихат айтылды.

Рухани кешті жуырда ғана «Қазыбек би» мешітіне имамдық қызметке тағайындалған Асылхан Нұртайұлы жүргізді. Ол алдымен өзін жамағатқа таныстырып, еңбек жолы мен алдағы жоспарларымен бөлісті.

Уағыз барысында имам салауаттың маңызына, артықшылығы мен рухани пайдасына тоқталды. Сонымен қатар Пайғамбарымыз Мұхаммедтің (оған Алланың сәлемі мен игілігі болсын) үмбетіне деген шексіз мейірімі мен салауат айтудың Жаратушы разылығына жақындататын құлшылық екенін кеңінен түсіндірді.

«Пайғамбарымызға салауат айту – әр мұсылманның міндеті. Салауат айтқан адамның жүрегіне тыныштық, өміріне береке келеді. Бұл — Алла разылығына жетелейтін амалдың бірі», – деді Асылхан Нұртайұлы.

Кеш соңында жамағат уағыздан рухани нәр алып, көкейлеріндегі сұрақтарын қойып, тұшымды жауаптарын алды.

ҚМДБ Қарағанды облысы өкілдігінің баспасөз қызметі