Қарағанды облысы, Шет ауданына қарасты Ақадыр кентіндегі «Иса молла» мешітінде Қазақстан мұсылмандары діни басқармасы бекіткен оқу-әдістемелік құрал – «Қазақ даласындағы мұсылмандық мектебі» кітабы негізінде жамағатқа арнайы дәріс ұйымдастырылды.

Игі іс-шараны мешіт имамы Азамат Серікұлы жүргізіп, кітаптағы тарихи деректер мен діни танымның қалыптасуы, қазақ даласындағы діни білім ошақтарының орны мен рөлі жайлы кеңінен түсіндірме берді.

Дәріс барысында қазақ халқының діни сауат ашу жолындағы игі қадамдары, медреселер мен мешіттердің тарихтағы орны, сондай-ақ бүгінгі қоғамға берер тәлімі туралы мағлұматтар айтылды.

«Ата-бабаларымыздың имандылық жолындағы ізденісі мен білімге деген ықыласы бүгінгі ұрпаққа үлгі. Осы кітап арқылы жастарымыз өз тамыры мен тарихын тереңірек танып, дәстүрлі дініміздің құндылығын ұғынады», – деп атап өтті имам Азамат Серікұлы.

Жамағат дәрістен рухани азық алып, кітап аясында түрлі сұрақтарын қойып, тұшымды жауаптарын тыңдады.

ҚМДБ Қарағанды облысы өкілдігінің баспасөз қызметі