Center Image
IHSAN.KZ
«Қазыбек би» мешітінің шәкірттері «Дархан Дала» жобасын табиғат аясында өткізді
«Қазыбек би» мешітінің шәкірттері «Дархан Дала» жобасын табиғат аясында өткізді

Қарағанды қалалық «Қазыбек би» мешітінің ұстазы Асыл Көкешұлының ұйымдастыруымен мешіт шәкірттеріне арналған ерекше демалыс бағдарламасы өтті. Игі іс-шара «Дархан Дала» жобасы аясында ұйымдастырылып, шәкірттердің рухани, тәрбиелік тұрғыдан дамуына және табиғаттың әсемдігін сезінуіне мүмкіндік берді. Сонымен қатар жоба бірлік пен бауырмалдықты арттыруға бағытталды.

Алдымен шәкірттер Баянауыл өңіріне саяхаттап, табиғат аясында тынықты. Олар көрікті жерлерді аралап, ұлттық салт-дәстүр, тарих пен табиғи құндылықтар жөнінде танымдық мәліметтер алды. Саяхат барысында спорттық ойындар, пікірталастар, сұрақ-жауап сайыстары және рухани уағыз-насихаттар ұйымдастырылды.

Одан кейін шәкірттер Балқаш көлінің жағасында демалыстарын жалғастырып, табиғат аясында белсенді әрі мазмұнды тынығу мүмкіндігіне ие болды. Осы демалыс кезеңінде де ұстаз Асыл Көкешұлы шәкірттерге бауырмалдық, имандылық, табиғатқа құрмет, тәртіп пен тазалық тақырыптарында тәрбиелік дәрістер өткізді.

Сондай-ақ шәкірттер қазақ ғылымының дамуына зор үлес қосқан көрнекті ғалым, академик Қаныш Сәтбаевтың музейіне барып, оның өмірі мен еңбегі туралы мол мәлімет алды.

– «Дархан Дала» жобасының басты мақсаты – шәкірттердің діни сауатын арттыра отырып, ұлттық құндылықтарға, табиғатқа деген сүйіспеншілігін қалыптастыру, сондай-ақ саламатты өмір салтын насихаттау, білім мен демалысты ұштастыру – тәрбиенің ең тиімді жолы, – деді ұстаз Асыл Көкешұлы.

Шәкірттер бұл сапардан рухани және танымдық тұрғыда мол әсер алып, ұйымдастырушыларға шынайы алғыстарын жеткізді.

ҚМДБ Қарағанды облысы өкілдігінің баспасөз қызметі


Мәзір
Сайт тілі
© 2009 – 2025 IHSAN.KZ | ҚМДБ Қарағанды облыстық «Әнет баба» мешіті Барлық құқықтар қорғалған. Ihsan.kz сайтында жарияланған кез келген материалды көшіру, тарату немесе басқа сайттарға орналастыру кезінде Ihsan.kz сайтына сілтемені міндетті түрде көрсетуді сұраймыз.

© 2025 Сайтты әзірлеген - abir.kz