Қарағанды қалалық «Төлеутай ата» мешітінде отбасылық құндылықтарды дәріптеу мақсатында «Ынтымағы жарасқан жанұя» атты отбасылық эстафета ұйымдастырылды. Іс-шара мешіт имамы Рауан Төлеубекұлының бастамасымен және жамағаттың қолдауымен өткізілді.

Эстафетаның негізгі мақсаты – отбасы мүшелері арасындағы өзара ынтымақ пен сенімді арттыру, ата-ана мен бала арасындағы байланысты нығайту, сондай-ақ ұлттық ойындар арқылы саламатты өмір салтын насихаттау. Сонымен қатар жамағат арасында достық пен бауырмалдықты күшейту де назардан тыс қалмады.

Сайысқа әкелер мен балалардан құралған командалар қатысып, түрлі спорттық және зияткерлік жарыстарда өзара бақ сынады. Қатысушылар ептілік пен бірлікті танытып, көтеріңкі көңіл-күйде өнер көрсетті.

Балаларға қуаныш сыйлау мақсатында арнайы аниматорлар шақырылып, ойын-сауық бағдарламалары көрсетілді. Сонымен қатар ұлттық дәстүрді ұлықтау үшін арқан тарту, асық ату сынды ойын түрлері де ұйымдастырылды.

Іс-шара соңында белсенді қатысушыларға естелік сыйлықтар табысталды. Жамағат тарапынан жылы лебіздер айтылып, игі бастамаға оң баға берілді.

ҚМДБ Қарағанды облысы өкілдігінің баспасөз қызметі