16-ақпан күні Қарағанды қаласы Кеншілер мәдениет сарайында өткен Мәуліт мерекесінде ақындармыз: Әділов Тілеген, Айтбай Жұмағұлов, Ақанов Мақсат пен Дидар Қамиевтердің Мәуліт мерекесіне арнайы бірігіп айтқан мадақ жырлары салтанаттың көркін қыздырды. Ұтымды ұйқастары пайғамбар өсиетімен үндесіп, өзінше қабысып жатты. Ат сүрінгенше сөз тапқан мұсылман қазақ үшін айтыс өнерінің жөні қашан да бөлек. Айтыс десе, ішкен асын жерге қоятын талантты ақындардың ғибратты өлеңдерінің жазбаша нұсқасын оқырмандарымыз сіздерге ұсынғанды жөн көрдік.

Тілеген Әділов: Бисмилла Аллаһу акбар ұрандайын, Жұмыр жүрек ашылса Құрандайын Мақтау мадақ Жартақан ұлы Аллаға, Пайғамбарға айтылар бір ән дайын. Жалғыз Алла көтерсе дәрежемді, Көкке қанат керейін қырандайын. Алла деп әр қадамын аттаған ел, Тек қана бір Алласын мақтаған ел. Бабасының мұрасын сақтаған ел, Баласының талабын қақпаған ел. Аңшысына мінгізіп Ақтабан кер, Қамшысына тобылғы саптаған ел. Іріген сүттен құймай қонағына, Шіріген қайыңнан шаппаған ер. Құшқаны қаса сұлу иманды жар, Дұшпанын кеудесінен таптаған ел. Кебежесін жоқшылық кеп қатырса да, Керегесін отын қылып жақпаған ел. Шаңырағын түсірмей ортасына, Саңлағын сарабдал баптаған ел. Таңдайын таңқураймен жібітсе де, Маңдайын қызыл күнге қақтаған ел. Малын құрап жүрсе де қу далада, Арын бірақ ешқашан сатпаған ел. Дін үшін зыр жүгіріп имамдар да, Ел үмітін осылай ақтаған ел. Әбу Бәкір, Омар,Осман, Әлидей болмаса да, Ислам үшін беймарал жатпаған ел. Құранды Фатихадан бастап оқып, Пайғамбарға салауат жаттаған ел. Ей, Ассалаумағалейкум, сәлем бердік, Сауап үшін сарайға қаптаған ел. Аталы сөзді енді ақтарамын, Ел алдына шыққанда шаттанамын. Оң жақтағы періштем көп жазса екен, Ашып тастап дәптердің ақ парағын. Зікір, ғұсыл, таһарат намазбенен, Шайтанның азғыруынан сақтанамын. Аллаға шүкір Пайғамбардың үмбеті болғаныма мақтанамын Әлемдердің туғалы білгірі болған Мұхаммед! Өзінен бұрын болған Пайғамбарлардың дүлдүлі болған Мұхаммед (с.ғ.с.)! Тура жол мен әділдікке жаршы болған Мұхаммед! Тура жол сілтеп біздерге тамшы болған Мұхаммед! Қайғының бұлтын ыдыратып, балқыта білген Мұхаммед! Жәннатты айтып көңілді шалқыта білген Мұхаммед! Көркемдік, байсалдылығымен асып туған Мұхаммед! Жомарттық, жайсаңдығымен тасып туған Мұхаммед! Аспанның бұлтын нөсерлі суға айналдырған Мұхаммед! Көкорай мынау жерімді нуға айналдырған Мұхаммед! Қасиет пен кереметтің иесі болған Мұхаммед! Адамзаттың ардақты киесі болған Мұхаммед! Ия, Раббым Алла деп жылаймыз, Мұхаммед оның достарына игілігінді сұраймыз. Сол мейірім мен шапағатынды бізге де Алла сый ғып бер, Пайғамбарыма игілік бер деп жайнамазға құлаймыз. Ақірет күні болғанда, Пайғамбарымыздың қасынан баршамызды табылтсын, Күнәларымызды Алла арылтсын. Бұл дүниеден өткенде,шын дүниеге жеткенде, Мейірім нұрға малынтсын. Мақтау мен мадақтың иесі Құдіреті күшті алыпсың! Уақыт тар сөйлер едім амал қанша Бұл дүниеде тұрады базар қанша Ал Айтбай кезегіңді ал, кесіп сөйле, Сіздерге аударылды назар қанша Оралыңның барында бір сөйлеп қал, Күттіріп қояр дейсің ажал қанша Кезегіңді ал дағы көсіліп сөйле Қызыл тіл отыз тіске қажалғанша.   Айтбай Жұмағұлов: Мен едім Қарағанды құлагері, Арқаның топқа қосқан құла белі. Тіліңді отыз тіске қажашы деп, Тілеген қинамашы мына мені. Пайғамбарға салауат айтылғанда, Төбем көкке жетпейді бір-ақ елі. Бісмілләсіз сөзіме дәм келмейді, Дәмсіз сөзге әуезді үн келмейді. Жүзі жарқын жамағат көрген кезде, Кеудемді қуанышты ән кернейді. 2050 жоспарын құрып берген, Ел ертеңін қалайша хан көрмейді. Жолдауда мәңгі елміз деп басып айтты, Қалайша оған елім мән бермейді. Бұл ойы Елбасының тегін емес, Жақсы сөз рух пенен жанды емдейді. Мысалы бізден асқан ел жоқ қой деп, Америка ешкімді тең көрмейді. Өздерін аспан асты еліміз деп, Қытайлар барған жерде төр бермейді. Өзің болыс санайтын орыс халқы, Бұратана елсіңдер сендер дейді. Ең аяғы Шыңғысхан ұрпақтары, Біз әлемді жаулаған моңғол дейді. Біз сонда айтыңдаршы кімнен кембіз, Рухы асқақ халықты жау жеңбейді. Біз деген батырлардың ұрпағымыз, Не десеңде тақияна тар келмейді. Имамды елге Аллаһтың өзі пана, Исламмен тасымыз өрге өрлейді. Мәңгілігін ойласа әрбір адам, Біздерді бүкіл әлем мәңгі ел дейді. Мың өліп, мың тіріліп келген қазақ, Жасайды жер бетінде мәңгі өлмейді. Пенденің пейілі тар сараң болса, Адасар түзу жолдан надан болса. Адам біткен бақытты болар еді, Қолдарына Құран Кәрім алар болса. Аллаһтан ақ тілегі қабыл болар, Ішкені мен жегені халал болса. Үш адамда өлгеннен соң амал дәптер, Жабылмайды хадиске нанар болса. Біріншісі ғұлама ұстаздардың, Еңбегінен ел таным алар болса. Екіншісі жомарт бай халық үшін, Мешіт, мектеп, көпір, жол салар болса. Үшіншісі ата-ана перзентінен, Артынан құран, дұға барар болса. Балалар да жәннатқа кіреді екен, Қартайғанда ата-анасын бағар болса. Екеудің ең бақыты сол болады, Өсірген ұл қыздары адам болса.   Мақсат Аханов: Жасымнан бір Алла деп атқа мінгем, Ұл едім кәлимасын жатқа білген. Құлшылығы Құдайға дұрыс болмай, Құл көп, ем жоқ қауышқан баққа бірден. Азын-аулақ айтайын түйгенімді, Дат ұлындай ұл едім датқа кірген. Сахаба болмасам да дін таратқан, Сақадай азаматпыз сапта жүрген. Мәуліт айы мүбәрак болсын елім, Осылай амандасып топқа бірден. Алдында бір сөйлейін туған елдің, Тура жол тілеп жүрген хақ Тәңірден. Дінге келу ең үлкен жеңіс дейді, Қаншама қателікті тегістейді. Тілеген, Айтбай менен Дидар інім, Үшеуі құлшылықты көп істейді. Үшеуін періштедей деп айтар ем, Періште бұлар ұқсап жеп-ішпейді. Әй, менде айға қарап жүрген жоқпын, Мақсат та көп адамға беріспейді. Мысалы, бәз біреулер жұртты бөліп, Мәулітті бидғат деп терістейді. Осындай фитнә қылып жүргендерге, Бұл Мақсат аз білсе де келіспейді. Себебі мұндай жиын боп тұрмаса, Жұрт жиылып осылай көріспейді. Пайдалы іс жасасаң дәл осындай, Пайғамбардың діні де өрістейді. Ағайын кімге айтайын бұл өкпені, Кеп тұрмын кей жағдайды жыр еткелі. Жамағат көбейгенмен мешіттерде, Жаман ат та барады үдеп тегі. Мұсылман болып жүрген кей бауырдың, Сыртқы күш боп тұр қазір тіректері. Намазда тұрғанында талтайып алып, Кеудесіне байланып білектері, «Әминді» ерегесіп айқайлайды, Имамдар қой десе де, дір етпеді. Иегіне қауқадай сақал қойып, Бұның не дегендерге сүннет деді. Жарайды сүннет болса, сүннет шығар Балағын кескендерге күледі көбі. Бір мешітте жүргенмен жамағат боп, Бір жерден шықпай отыр тілектері. Имамдар айтқанымен амал қанша, Иманда ақау боп тұр жүректегі. Тілім деп шырылдайын Мұхтар болып, Дінім деп шырылдайын сырттан болып Жайбасар, алаңғасар халықпыз ғой, Жауын жауса жүретін бұлттан көріп. Ежелден еліктегіш ел едік қой, Бірдеңені жасайтын жұрттан көріп. Санаулы аз қазақтың көрмейсің бе Санасын улап жатыр сырттан келіп. Елім-ау есіңді жый, осы бастан, Ертеңін ойламайды-ау жұрттар неғып. Батыстың батпағына кіріп кетіп, Шатысып жатқан жоқ па ұлттар кеміп.   Дидар Қамиев: Құдайым біз секілді құлды ақсатпа, Төрт ақын шығып міне, тұр Мақсат та. Үшеуі құлшылықты көп істейді деп, Біздерді қалдырды ғой бұл жақсы атқа. Дін жайлы көп білмеймін, көп білмеймін деп Біраз нәрсе айтты ғой, бұл Мақсат та. Ақындар өзіңді елге қылмай қарыз, Тіліңмен сөздің майын тынбай тамыз. Үш бірдей ағадан соң кезек алған, Ағайын Дидарыңды бір байқаңыз. Жамағат жаңа Мәке қозғады біраз жайды, Ағаның сөзін жалғап біз де айтамыз. Бұл күні мұсылманда іріткі көп, Арасында осындай сын да айтамыз. Көзбен атып қарайтын бауыр көріп, Мешіттен қапа болып шын қайтамыз. Мұсылман мұсылманды жаудай көрсе, Басқа дінге қалайша үлгі айтамыз. «Бірліктің түбі-тірлік» -деп айтатын, Сөзіңді қандай қазақ қылмайды аңыз. Жұмыла көтергенге жүк жеңіл деп, Мақалды ауызбенен күнде айтамыз Сондықтан мына бізге бірлік керек, Сонда ғана өрістер дінді айтамыз. Қарағанды ақындарын көрдіңіздер ғой, Жамағатқа жұғымды жырды айтамыз. Бірліксүйгіштігіміз соншалықты, Бір арнауды жабылып бірге айтамыз. Халықты ынтымаққа шақырмасақ Қалайша бұл Мәуліттен құр қайтамыз. Қош айтып мұнар басқан мұңды күнге, Қосылды Алаш елі тың дүбірге, Ырысыңның тарқамай тұрғандығы, Елімнің ынтымағын білдіруде. Осыны көре алмайтын дұшпандарым, Жан салып жүр ел ішін бүлдіруге, Олардың бар мақсаты араңдату, Араз қылып айдап салу бірді-бірге. Сондықтан сауысқандай сақ тұрмасақ, Қапияда сөгілер бір күн ірге. Халықты Исламға қарсы қойып, Құбыжық қылып қойды дінді мүлде. Бәріміз жұдырықтай жұмыла алсақ, Түтінің түзу ұшар түңлігінде. Халықты ынтымаққа шақыра алсам, Сол мен үшін бүгінгі құнды жүлде. Бодандықта өткізген мың күніңнің, Бодауы бейбіт өткен бір күнінде Мемлекеттің байлығы ақшада емес, Балталаса бөлінбес бірлігінде. Сайтқа дайындаған: Тотия Енсебаева

---