20 ақпан күні Саран қаласының мәдениет үйінде ұлы Пайғамбарымыз Мұхаммедтің (с.ғ.с.) туылған Мәуліт айына арналған салтанатты мереке өткізілді. Мәдениет үйіне халық таңертеңнен жиылып қонақтарды асыға күтті. Мерекелік шараны ұйымдастырған қала әкімі Мұхтар Ермекбайұлы және Маслихат хатшысы Рүстем Толықбайұлы құттықтау сөз сөйлеп, келген қонақ имамдарға ризашылықтарын білдірді. Қарағанды облысының өкіл имамы Өмірзақ қажы Қазкенұлы бастаған қала және аудан имамдары Құран оқып, пайғамбарымызға салауат айтып, тартымды уағызбен халықтың ризашылығына бөленді. Саран жұртшылығы облыс имамы Өмірзақ қажының бірлік тақырыбындағы уағызына және келген имамдардың біліктілігі мен ауызбіршілігіне дән риза болды. Биылғы жыл бас мүфти хазрет Ержан қажы Малғажыұлының бастамасымен «Дін және дәстүр» жылы деген игі шараны облыс аумағында ұйымдастырған облыс имамы Өмірзақ қажы Қазкенұлының ұсынысын қолдап, Саран мешіт шәкірттері діни өсиеттерді айтып, қазақтың әсем де тартымды әндерімен халықтың көңілін көтерді. Мереке соңында Саран мешітінің бас имамы келген жамағатқа жақсы тілекпен бата берді.