Біздің сайтымызда көптеген өнегелі ғибратты әңгімелер жарияланған. Солардың көбісі мұқтаж жандарға, мүгедек, тағдырдың тәлкегіне түскен адамдарға қол ұшын беру, көмектесу жайында. Тағы бір әңгімеде «Сайраған тілден не пайда?» дегеніміз тағы да бар. Сөзіміз бен ісіміздің сай келетін тұстары көп, оны бірі білсе, бірі білмес. «Біреу тойып секірсе, біреу тоңып секіреді»- дейді атам қазақ. Банктерде миллиондап ақшаларын тықпалаған байлар жиған – тергенінен айырылып қалмаудың жолын қарастырып безек қақса, енді біреулерді ертеңгі күні бала-шағама нанды қайдан табам деген ойлар мазалайды. Балалары үшін шырылдап мешітке көмек сұрай келген аналарды көргенде жүрегіміз жылап қоя береді. Мешіт қызметкерлері, мешітке келген жамағаттар қолдан келгенінше көмектесіп жатады. Мысалға кеше, ақпан айының 21-күні Қарағанды облыстық орталық мешіттің найб имамы, Жалпы және жастар бөлімінің өкілі Жақия Мерейдің ұйымдастыруымен көп балалы ана Нұразизова Ләйлә Қасымбайқызына бесік арбасы үлестірілді. Бұдан алдын Уереповская Мария тәтейге бір сөмке толы киім-кешек берілген еді. Орталық мешіттен бастау алған қайырымдылық шаралары аудан мешіттерінде де жалғасын табуда. Бірақ мешіттің көмегі көпке жете бермейді. Игі істер жалпыға үлгі болса екен дейміз. Қаншама жиған байлығыңнан бір адамға қол үшін бермей, шын мұқтажға көмегіңді тигізбесең, мейлі бір қап ақшаң болсын, құны көк тиын.