Ақпан айының 22-күні Қарағанды облыстық орталық мешітіне орамал таққан Крестина Ислам дінін қабылдағысы келетіндігін айтып, арнайы келді. Қазіргі таңда Батыс елдерiнiң кейбiр қатардағы азаматтары да, баспасөзде аттары аталмағанымен, кәлима айтып, мұсылмандардың санатына кiруде. Елiмiзде де орыс, грузин, кәрiс, неміс халықтары өкiлдерiнiң бiрсыпырасы мұсылман болды. Алланың хақ жолына қалай бағыт алғандары бәрімізді қызықтырады. Әркімнің өз айтары бар. Біз де ұлты орыс болғанмен, қазақша таза сөйлейтін Крестинамен сыр бөліскенді жөн көрдік.

Өзіңіз жайлы аз-кем хабардар болсақ?

– Аты-жөнім – Вороновская Крестина Аркадьевна. 1995 жылы Қарқаралы өңірінде дүниеге келдім сол жерде өстім. Ұлтым – орыс. Е.А.Бөкетов атындағы Қарағанды мемлекеттік университетінің дінтану бөлімінің 1-курсында оқимын. Мамандығым дінтанушы болғандықтан, біз әлемдегі барлық діндердің тарихынан бастап, бүгінгісіне дейін оқимыз. Оқығаным мен тоқығанымның арқасында көкейдегі сауалдарымның бәріне жауап ала алдым. Ол жауап – Ислам діні. Тек Ислам діні жайлы оқығанымда, ақиқат жолы, хақ жол осы екенін түсіндім.

– Ислам дінін қабылдауыңызға әке-шешеңіз қалай қарады?

Өзімнің, жүрегімнің қалауы болғандықтан, әке-шешем қарсылығын білдірмеді. Сол себепті де өзім арнайы мешітке келіп отырмын.

Ислам дінін қабылдағаннан кейін, көп қыздар есімдерін ауыстырып жатады. Сіз ше?

Көптен Камила деген есім ұнайды.Мен де атымды ауыстырығым келеді.

Рахмет Камила!

Сұқбаттан соң, Қарағанды облыстық орталық мешітінің имамы Арыстан Тенелов азан шақырып, «Камила» есімін қойды. Камиланың оқу білімге деген ниеті зор екенін көріп, сыйға кітапхана қорынан бірнеше кітаптар ұсындық. Мешітте өтетін дәріс-сабақтардың кестесімен танысып, Алла қаласа, жақын арада намазды бастаймын деп отыр. Алла сол ниетіне жеткізсін дейміз!Құдай оңдап, намазға жығылып жатсаң, кәлиманы айтудан кейінгі бақытқа жеттім деп біл. Милиардтаған адамдарға бұйырмаған бақыт бұйырды деп ойлай бер. Сөйт те Құдайға жалбарына түс. «Намазымнан айырма, адастыра көрме, тура жолға бастай көр» деп жалын. Иә, Алла бізді адасудан сақтасын. Ниетің қабыл болсын, сіңлім. Алла Тағала қашан да иман келтірген құлына жақсылық қалайды.  

Сұхбаттасқан: Тотия Енсебаева

Қарағанды облыстық орталық мешітінің баспасөз қызметі

---