Қаламыздағы мұсылмандардың «Нұр» мешіті біраз жылдан халыққа қызмет көрсетіп, игілігі мен имандылығы үйлесімін тауып, жұртшылықты жақсылыққа, адамгершілікке шақырып, Алланы мадақтауға, Пайғамбарамызға (с.ғ.с.) салауаттар айтуға баршаның жүрегінде жаңа серпіліс оятқаны белгілі. Әсіресе жастардың Ислам дінін құрметтеуіне ат салысып жатқан мешітіміздің ішкі және сыртқы жағдайына сын айтқан 31 - телеарна тілшісіне көпшілік наразылық білдірді. Осыған орай газетіміздің тілшісі қаламыздың бас имамы Қоныскерей Құмарұлымен әңгімелескен болатын.

- Қоныскерей Құмарұлы, қаламызға 6 ақпан күні атбасын бұрған 31 - телеарна тілшісіне берген сұхбатыңызды газетімізде толықтырсаңыз...

-Сөзімді аса қамқор, мейірімді Алланың атымен бастаймын! Мешітіміз нашар халде еместігі қала тұрғындарына, тіпті өзге де қала, аудандарға да мәлім. Бүгінгі күнге дейін алыс аймақтардан келіп мешітімізге қадам басқан мұсылман бауырларымыздың есебі сансыз. Егер ақуалымыз, жалпы жағдайымыз төмен болса келер ме еді?! Әрине, келмес еді. Бірақ та рұқсатсыз, оқыстан келіп мешітіміздің жағдайын нашар халде көрсеткен 31- телеарна тілшісіне аздап ренжігеніміз рас. Сән - салтанатымызды ескермей, болмашы тұстарымызды көрсеткені өкінішті болды. Асханамыздың сыртқы қабырғасына ұсақ – түйек жөндеу жұмыстары қажет ететіндігі сыр емес. Біз әрине, өткен жылдан бері қолдан келер барлық жағдайды жасап, тіпті өз күшімізбен де жөндеу жұмыстарын жүргізіп жатырмыз. Алла разы болсын! «Айтылар жерде айтылмаса, сөздің атасы өледі» деуші еді, қала әкімдігінің қамқорлығымен мейірбан, жомарт та адамгершілігі мол азаматтардың арқасында мешітіміз аз уақыт ішінде жаңаша өзгерістерге бет бұрды. Әсте заман талабына сай мешіттірдің біріне айналып келеді. Қалалық жылу мекемесінің көмегімен мешітіміздің жылулық жүйесі, кәсіпкерлер, мәслихат депуттары тарапынан жамағат құран оқитын ғимараттың іші және сырты қайта жөндеуден өтсе, асханамыздың көлемі кеңейтіліп, өрт қауіпсіздігінің алдын алу мақсатында қажетті құралдармен қамтамасыз етілді. Сонымен қатар мешітіміз діни көргізбеліктермен де жабдықталды. Әр жұма намазында мешітімізге келіп сәждеге маңдай тигізетін мұсылман жамағаттың ешбірі наразылық танытқан жері жоқ еді, дейтұрғанмен «сөз иесін табады» дегендей, телеарнаға мешітімізді көреалмаушылықпен, қызғанышпен орынсыз ақпар беретіндер бар екен деген күмәнды ойда қалдық.

- Дұрыс айтасыз, аз уақыт ішінде мешітте көптеген жөндеу жұмыстары жүргізілгені ақиқат. Ал енді Исламда көрсетілген шариғаттарды насихаттау, уағыз айту, халықтың руханиятын күшейту бағытындағы атқарылып жатқан істер жайлы не айтар едіңіз?

- Басты мақсатымыз – сан ғасырлық тарихи диніміздегі үзілгенді жалғап, жоғалғанды түгендеу. Шариғаттағы мәзһабымыз бен ұлттық танымымызды өркендету. Осы бағытта мешітіміз имамдары тарапынан біраз шаруа тындырылды деп айта аламыз. Дүйім жұрттың діни көзқарасы мен деңгейін күшейтуде барынша еңбек етудеміз. Пайғамбарымыз Мұхаммад Мұстафа (с.ғ.с.) «Аллаға және ақырет күніне сенетіндер өзгелерге жақсылық жасасын» деген екен. Бүгінгі жастардың жүрегінде отаншылдық сезімін оятуда, мейірімділік пен ізгілікті арттыруда насихат тобымыз тәлім – тәрбие орындарында, жазасын өтеп жатқан азаматтар арасында кездесулер, дөңгелек үстелдер өткізіп келеді. Оларды қазақы тәрбиеге баулуда, зұлымдық пен жамандық атаулыны аластатуда имандылық маңызды рол атқаруда. Айта кетер жайт, Алла разы болсын! Нұра ауданының Щербаков ауылына бас имам етіп тағайындалған мешітіміздің наиб имамы, жас маман Рашид Жұмағұлов көптеген жастың сауатын ашып, жүректерге діни имандылық дәнін екті.

-Сіздер тарапынан қайырымдылық, қамқорлық шаралары да аз атқарылмай жатқанын білеміз, түрлі мерекелер қарсаңында, әсіресе айт мейрамында өзгенің көмегіне мұқтаж жандарға көмек қолын созғандарыңызға талай рет куә болдық. Осындай қайырымды істерге алып – қосарыңыз бар ма?

- Өзгелер де куә болғаныдай, осы күнге шейін көптеген азаматтарға, қамқорлыққа мұқтаж отбасыларға көмек қолын созғанымызды айқақтайтын істеріміз өте көп.Оның барлығын аясы тар сұхбатымызға сыйдыра алмаспыз. Біз айт, мәуліт мейрамдарында көмекке мұқтаждарды қажетті азық – түліктермен, киім - кешектермен қамтамасыз етсек, сонымен бірге «Мектепке жол акциясы» шеңберінде де табысы аз отбасы перзенттерінің тәлім – тәрбие алуларына жағдай жаратып, оқу – құралдарын да алып бердік. Еліміздің болашағы болған бүлдіршіндерге жоғары көңіл күй сыйлап, ойын – сауықтар ұйымдастырып беріп, тәттілер тарту еттік. Ораза тұтқан аталарымыз бен әжелерімізге дастархан жайып, аруақтардың рухына құран бағыштаған тұстарымыз да аз емес. Осының барлығы халық игілігі үшін жасалып жатыр. Қайырымдылық істерінде қала әкімдігі, кәсіпкерлер, халық депутаттары ерекше атсалысты. Оларға, отбасы мүшелеріне Алла тағаламыздың айрықша шапағаты тиетіні сөзсіз.

- Иә, халық игілігі үшін жасап жатқан істеріңіз, қайырымдылық шараларыңыз аз емес. Имандылық жолындағы алдағы жоспарларыңыз қандай болмақ?

-Алла қаласа, биылғы жылда да қала тұрғындарының діни сауаттылығын күшейтуге, қолдауға, көмекке зәру пенделерге барынша көмек етуге қызмет көрсетіп, еңбек етеміз деген үміттеміз. Асхана орналасқан ғимараттың бір бөлігі бос тұр. Осыны мәйітхана етіміз бе деген жоспарымыз да бар. Мұның барлығы уақыттың еншісінде әрине. Жаратқан Иеміз қолдау көрсетсе, алдағы уақытта мешітіміздің барлық талапқа жауап беретініне сенімдімін.

-Уақыт ажыратып, әңгімелескеніңізге рахмет. Иман жолындағы жұмыстарыңызға табыстар тілеймін.

Сұқбаттасқан Аманкелді Тұржанов