Зекет қорына жетекшілік етіп жүрген Бабағалиев Базарбай қор жұмыстарын белсенді түрде атқарып, дінбасымыз Ержан қажы Малғажыұлы хазіреттің міндеттеген қайырымдылық шараларын ретімен атқарып келеді. Осы негізде зекеттің мағынасына қысқаша тоқталып кеткен артық болмас. Дініміз Исламда «Зекет» - көбею, өсу, берекет, тазару, аста-төк нығметтерге шүкірлік айту секілді мағыналарды қамтиды. Ал, зекеттің шариғаттағы мағынасы қоғамдағы мұқтаж адамдарға қаржыны (мүлікті) риясыз көмек ретінде, нисабқа ие болған адам, байлығының белгілі бір бөлігін жылына бір рет Алланың ризылығы үшін беруі. Зекет – тек материялдық көмек беру ғана емес, ол ең алдымен мұсылманға жүктелген міндет. Хадисте: «Мал-мүліктеріңді зекетпен қорғаңдар. Ауруларыңды садақамен емдеңдер және бәле-жалаға қарсы дүға әзірлеңдер» деген. Осы орайда, тынымсыз насихаттың нәтижесінде мұсылмандық парызын түсінген жандар тиісті орынға зекетін беріп, ғаріптерге қол ұшын беруді әдетке айналдыра бастады. Сондай ізгі іс «Облыстық соғыс ардагерлеріне медициналық көмек көрсету» орталығында жүзеге асты. «Қарағанды облыстық шағын кәсіпкерлікті қолдау орталығының директоры» Санаубаев Серік Мәлібекұлы аталмыш мекемеге мүгедектерге арналған қол арба мен қос балдақты бақилық болған анасы Мәриям Шаймерденқызының атынан тарту етті. «Артымда ұрпақ қалса екен, мені есіне алса екен» деген ұлағатты өсиетті өнеге тұтқан ұрпақ шынайы мұқтаждарға арнап осындай игі іс жасады. Бақилық болған анасы өз кезінде осы мекемеде басшылық қызмет жасап, мұң-мұқтаждарға қалтқысыз қызмет атқарған екен. Сауапты және қайырымды амалды артындағы ұрпақтың жалғастырып, ұрпақ сабақтастығын баянды ету әрбір жастың көкейінде болғаны жөн. Зекет қорының қызметі толығымен ашықтық принциптеріне негізделгендіктен осындай ізгі амалдар өзгелерге өнеге болса деген ниет бар. Зекет қорына қол ұшын созып, оның қарқынды дамуына мүмкіндігінше жәрдем етіп жүрген мұсылман қауымына Алла тағала разы болсын!

Қарағанды облыстық мешітінің баспасөз қызметі