Ағымдағы жылдың 24-ші ақпан күні Балқаш қаласындағы мамандандырылған күзет қызметі басқармасының Балқаш қалалық полиция ротасында кездесу болып өтті. Оған Балқаш қалалық мешіттің найб имамы Ақбанов Нұрхан, рота командирі Кәрімбаев Ержан Бейсентайұлы, взвод командирі Нұсқабаев Ержан Зделеуұлы және қызметкерлер қатысты. Кездесу барысында «суицид» деген не, оның алдын алу шаралары бойынша тақырыпта сөз қозғалып, дін өкілі ислам дініндегі суицид туралы мазмұнды мына сөздермен түсіндіріп өтті: Кісі өлтіру, оның ішінде өзі өзіне қол жұмсау, яғни суицид Алла тағалаға серік қосу күнәсінен кейінгі екінші үлкен қылмыс болып табылады. Жан Жаратқанның бізге берген ең үлкен аманаттарының бірі. Әрине, бұған қиянат ету ауыр күнә. Құран Кәрімде Ниса сүресінің 29-аятында: «Және бір біріңді (өздеріңді) өлтірмеңдер. Расында Алла сендерге ерекше мейірімді», - деп айтылса, осы мағынада Бақара сүресінің 195-аятында: «Өздеріңді өз қолдарыңмен қауіп қатерге салмаңдар...», - деп әмір етеді. Аяттардағы әмір қандай жағдайда да, адам баласы өзінің және басқа адамның өміріне қастық етуіне болмайтындығы айтылуда. Адам баласы қатты науқас болса да, өмірі қаншалықты қиындап кетсе де өзіне қол жұмсаумен жеңілдікке қол жеткізе алмайды және де сабырлық туралы уағыз-насихат айтып, діни сауалдарға жауап берді.