Бас имам Орманбет қажының бастамасымен 80-игі шара аясында қаламыздағы «Ботагөз балалар үйі» мемлекеттік мекемесіндегі жетім балаларға қайырымдылық көрсетілді. Ардақты пайғамбарымыз с.ғ.с хадисіндегі «Жүрегіңнің жұмсаруын қалаймысың? Онда жетімге мейірімділік көрсет, басынан сипа және тамағыңнан бөліп бер» деген ұлағатты өсиетті жаңғырту мақсатында «Бір иіскесем анамды, болмас еді арманым» деп, ана мейірімі мен әке қамқорлығын аңсап өсіп жатқан балаларға тәтті тоқаштар мен жеміс-жидектер, жұмсақ ойыншықтар тарту етілді. Мекемеге №1-мешіттің атынан екі кілем сыйланды. Жүздеріне қуаныш, көңілдеріне медет болуға септігін тигізген дін қызметкерлері балалардың болашағына бақыт пен шаттық тілеп бата жасап тарқады. Десек те, осындай мақсаттағы түрлі қайырымды істер жер-жерде көрініс тауып, жетімдер үйлеріне көмек берілгені дұрыс, бәрінен дұрысы – жетімдіктің алдын алатын шараларға мән беру екендігі есімізде болса екен.