Аптаның ішінде екі мәрте қайырымдылық шарасын атқаруды жоспарлаған №1 мешіт ұжымы түрлі бағытта жұмысын жалғастырып жатыр. Күндердің сұлтаны болған жұма күнінің қарсаңында наиб имам Мұсағали Аясұлы екі бірдей жарымжан мүгедек жандарды асырап отырған жалғызбасты ананың отбасына арнайы зиярат жасап, мешіт атынан ет, азық-түлік апарып берді. Жабырқаулы жандардың жағдайын сұрап, Алладан шипа болуын тілеп, олармен еркін сұхбаттасты. Мешіт жанындағы діни сауат ашу курсында тәлім алып жүрген қыз балалар да қайырымды істен қалыс қалмай, үй-ішінің тазалық жұмыстарын ретке келтіруге қол ұшын беріп қайтты.