Осакаров ауданы тұрғындары Асыл Пайғамбарымыз хазіреті Мұхаммед (с.ғ.с.) – тің туған күні-Мәуліт мерекесін аудандық мәдениет үйінде арнайы мерекелік шарамен атап өтті. Ақпан айының 27–күні ұлықталып өткен рухани кеште алдымен Пайғамбарымыздың (с.ғ.с.) ғибратты өмірі, адамдық болмысына салауат айтып, Қарағанды облысының наиб имамы Серік Аманбайұлы Құран оқумен бастады. Осакаров ауданының әкімі Сержан Аймақов, Қазақстан мұсылмандары діни басқармасының Қарағанды өңіріндегі өкіл имамы, Қарағанды облысы орталық мешітінің бас имамы Бекқожа Өмірзаққажы құттықтап, аудан әкімі ауданымыздың барлық елді мекендерінде Мәуліт мерекесін ұйымшылдықпен өткізуге белсене атсалысқаны және діни ахуалы тұрақтылығына үлес қосқаны үшін Тоқа Байғозы қажы мешітінің Бас имамы Қанат Анасұлын аудан әкімінің Алғыс хатымен марапаттады. Пайғамбарымыз (с.ғ.с.) Теміртау қаласы мешітінің наиб имамы Әлібекқажы және Осакаров аудандық мешітінің шәкірттері салауат айтты. Осынау қуанышты сәтте әжелер шашу шашты. Заманауи ілімді дінмен ұштастырып Республикалық ақпараттық – насихаттау тобының мүшесі, «Нұрлы білім» қоғамдық бірлестігінің төрағасы Рүстем Мәлікұлы уағыз айтты. Жас ақын, термеші Нұрмұхаммед Байсұгүр «Жоқ іздеп жүрмін» атты термесін арнады. Тәттімбет атындағы өнер колледжі актерларының «Шын достық» атты имандылық тақырыбында шағын көріністер ойналып, аудандық мешітінің шәкірттері салауаттары айтылып, орындауында Алланы, Отанды сүю, имандылық тақырыптарында иләһи әндер орындалды. Қарағанды облысы бойынша өкіл имамы ардақты Пайғамбарымызды (с.ғ.с.) тану, өнегелі де ғибратқа тола өмірі туралы кең көлемде уағыз – насихат айта келе аудан әкіміне алғыс айтты. ҚМДБ төрағасы, бас мүфти Ержан қажы Мәлғажыұлының тапсырмасы бойынша Ауданның бас имамы Қанат Анасұлы, «Мәуліт - рақым айы» атты шығарма байқауының жүлдегерлері Осакаровка кентінің №1 орта мектебінің 8-ші сынып оқушысы Серікбек Бергенжан, Қарағайлы ауылы мектебінің 3-ші сынып оқушысы Абілқазыұлы Бауыржан және бас жүлдегер №1 орта мектебінің 11-ші сынып оқушысы Кудебекова Шолпанды бағалы сыйлықтармен марапаттай Алла Тағаланың хикметтері, асыл Пайғамбарымыздың (с.ғ.с.) сүннеттері мен хадистерін көркем мысалдарымен көмкеріп, тұрмысы төмен отбасылардың жүрегіне қайырымдылықпен жол тартып, Қарттар үйіндегі қариялардың ақ батасын Мәуліт кешінің дархан дастарханының алғыс батасымен байытты. Адамзаттың асыл тәжі, екі дүние сардары – сүйікті Пайғамбарымыз Мұхаммед мұстафа (с.ғ.с.) - ның мәуліт мерекесіне арналған «Ғаламның Рахым нұры» атты мерекелік кешті Бапанов Арман, Шолотаев Казбек жүргізді.

С.Смаханұлы