Бүкіл әлемге нұр берген, ақырғы Пайғамбарымыз (с.ғ.с.) дүниеге келген күн барша мұсылман қауымы үшін шынайы мереке. Қасиетті Мәуліт күні Пайғамбарымызды (с.ғ.с.) жүректерінде қайта жаңғыртып, оған сансыз салауат айтып сәлем жолдауға ақпанның 12-ші жұлдызында аудан орталығындағы мәдениет үйіне қарай ағылған жұртшылықтың қарасы көп болды. Пайғамбарымызға (с.ғ.с.) салауат айтып сәлем жолдау – имандылықтың белгісі. Кәрі-жасы, жұрт ағасы бәрі осында. Алла тағаланың бізге жауған нұры болар, ауа райы ашық болып, күннің көзі жарқырай түскен. Мереке күллі мұсылман әлемінің асыға күткен, адамзаттың асыл тәжі, екі дүние сардары –сүйікті Пайғамбарымыздың (с.ғ.с.) өнегелі өмірі, ғибратты ғұмырын насихаттаған видео көрсетіліммен ашылды. Мерекенің негізгі мақсаты ауыл халқын имандылыққа бұрып, жас ұрпақ тәрбиелеуде асыл дініміздіің қасиеттерін насихаттау болатын. Кең зал іші Мәуліт мерекесіне қатысушыларға лық толды. Пайғамбарымыздың (с.ғ.с.) сүннеті бойынша залдағы әр орындықтың үстіне «Мәліт мерекесі мүбәрак болсын» деп ыдысқа салынған құрмадан қойылып, Мәулітке қатысқан жұртшылық ауыз тиісті. Ақ жаулықты әжелер мерекеде игі тілекпен шашу шашып, мереке шырайын аша түсті. Мерекенің бастауы құранды Ақадыр кентінің бас имамы Ә.Рақымжанов оқыса, ҚМДБ-ның Қарағанды облысы бойынша өкіл имамы Қарағанды қаласы орталық мешіттің бас имамы Өмірзақ қажы бата беріп, жүздеріне қуаныш, жүректеріне иман ұялаған аудан тұрғындарын, барша мұсылман қауымының мерекесімен құттықтап, Пайғамбарымыз (с.ғ.с.) өнегелі өмірінен уағыз айтып, ақжарма тілегін білдірді. Жиынға арнайы шақырылған дін танушы теолог Рүстем Сыздықов сүннет туралы, дәстүр жайында жұртшылыққа кеңінен әңгімеледі. Ғалымның жан-жақты, көпшілікке түсінікті етіп айтылған ғибратты сөздерін жұртшылық беріле, ұйып тыңдап, ризашылықтарын білдіріп жатты. «Хазіреті Али» мешітінің бас имамы Жағыппаров Берік пен Хантурин Елдос екеуі арабша мауліт оқыса, ауыл молдалары мен жастар қосылып, салауат айтып сәлем жолдады. Бұдан соң, сахнаға шыққан Қазақстан жазушылар одағының мүшесі Кәмел Жүністегі қажы ақ пейіл, адал жүрегімен ақ тілегін білдіріп, Пайғамбарымызға (с.ғ.с.) салауат айту үшін мәулітке келген қадамымызға Алла тағала сауапқа жазсын деген тілекке толы ой толғамын ортаға салды. Сауабы мол рухани шараның көпшілікті бір селт еткізер тұсы республикаға кеңінен танымал, жерлесіміз, айтыскер ақын Дидар Қамиев Маулітке арнау айтуы болды. Сондай-ақ, С.Сейфуллин атындағы қазақ драма театры әртістерінің «Тәубаға келу» көрінісі де көкейге қонымды сомдалды. Іс-шара соңында ауданның бас имамы Берік Алпысбайұлы Мәуліт мерекесін ұйымдастырып, өткеруге ұйытқы болған аудан азаматтары мен кәсіпкерлерге, жиналған жұртшылыққа ризашылығын білдірді. Мәуліт мерекесіне келген қонақтарға сый-сиапат көрсетіліп, мешіт асханасынан дәм берілді.