Өткен аптаның қасиетті жұмысы күні Кеншілер мәдениет сарайында Шахтинск технологиялық және тау – кен индустриалдық колледждерінің жастары дін өкілдерінен құралған насихат тобымен кездесіп, бұл маңызды шарада Ислам дінінің қасиеттері, адамды азғындыққа итермелейтін түрлі жат ағымдардың зияны туралы сабақ берілді.

Қазіргі күнде еліміздің барлық аймағында дін өкілдерінен, білікті мамандардан құрылған арнайы насихат топтары білім ошақтарында жиі кездесулер өткізіп, жасөспірімдер жат ағымдардың құрбаны болмауы үшін барынша күресіп жатқандығы белгілі. Тыныш, ашық аспан астында өмір сүріп жатқан еліміздің шырқын бұзуды көздеген қара ниетті ағымдарға қарсы күресуге әсіресе жастарды шақырған осы топ өкілдерінің ғибрат пен тағылымға толы әңгімелері жас буын өкілдерінің Отаншылдық, патриоттық рухын оятты. Кездесуді қалалық ішкі саясат бөлімі ұйымдастырды. Бөлімнің басшысы Сандуғаш Нұрмағанова кездесуге жиылғандарға өткізіліп отырған шараның мақсатын түсіндіріп, Сирия елінде қақтығыстарға тап болып, жазықсыз жат ағымның жетегінде кетіп құрбан болған барқанша қазақ жастарының қателіктерін, еліміздің атына кір келтіргенін айтып, ондай сұмдықтардан аулақ болуға, адамды азғыратын, жамандыққа, террорлық әрекетке жетелейтін жихадшылықтан сақ болуға шақырды. Онан соң зорлыққа, қылмысқа, кісі өлтіруге тәрбиелеу идеяларының тұқымын шашатын орталықтар - Пәкістан, Ауғанстан елдеріндегі жихадшылардың теріс әрекеттері, арам пиғылдарын әшкерелейтін қысқа метражды фильмдер көрсетілді. Кездесуде сөз алған қалалық «Нұр» мешітінің бас имамы Қоныскерей Құмарұлы Ислам дінінің пайдасы жайлы кең ақпарат беріп, асыл дініміздің бейбітшілікті насихаттайтынын, керісінше исламның атын жамылған, әлемде және біздің елімізде сегрегация мен зорлау саясатын тудыратын түрлі деструктивті ағымдар өзінің жамандық, зұлымдық зәрін шашып жатқандығын тілге тиек етті. Сондықтан да олар ең алдымен жастарды интернет желілері арқылы саналарын жаулап алғандығын, қылмыс істеуге, жауыздыққа баулитынын әсерлі әңгімелерімен айқындап берді. Одан кейін жат ағымдардағы террорлық саясаттардың зияндылығын жас ұрпаққа түсіндіруді, насихаттауды жалғыстырған қалалық мешіттің найб имамы Нұрғали Байкешев жыртқыш топтар ислам дінін саяси құрал ретінде пайдаланып, террорлық саясатты үндейтіндігін тәптіштеді. Осындай арам ниетті саясат біздің елімізде байлыққа тұнған мұнайлы өңірлердегі жастардың сана – сезімін жаулап алып, улап жатқандығын жеткізді. Өз кезегінде жастарға адамилық, ізгілік жайында ақпарат бере отырып, жақсылық істеуге, адамгершілікке баулыған қаламыздағы православиялық шіркеуінің өкілі Дмитрий Патрекеев өз сөзінде Христиан мен Ислам діні пәктікті, ізгілікті насихаттаушы дін екенін жеткізді. Жастарды жамандық жасамай, адалдық іске дағдылануға шақырып, жат ағымдардан сананы аулақ ұстауға кеңестерін берді. Кездесуде колледж студенттері дін өкілдерінен өздері қызықтырған сауылдарына жауыптар, діндер жайлы ақпараттар алды.

А.Тұржанов