Бүгін, яғни наурыз айының 13-жұлдызында Н.В.Гоголь атындағы Қарағанды облыстық әмбебап ғылыми кітапханасында Қазақстан мұсылмандары діни басқармасының төрағасы, Бас мүфти Ержан қажы Малғажыұлы хазіреттің бастамасымен шығарылған «Дін мен дәстүр» кітабының тұсаукесер рәсімі өтті. Аталмыш кеште алғашқы сөз кезегі Қазақстан мұсылмандары діни басқармасының Қарағанды өңірі бойынша өкілі Бекқожа Өмірзақ Қазкенұлына берілді. Өмірде әр халықтың өзіндік тілі, діні және ділі, яғни дәстүрі, салты болады. Бір дінде бірнеше халық бола береді, ал тілдері мен ділдердінде әр халықтың міндетті түрде бір-бірінен өзгешеліктері бар. Кітаптан қазақ халқының дәстүрінің ата дініміз – Ислам дінімен астарласып жатқандығын, тіпті дәстүріміздің дені дініміздің қағидаларын күнделікті өмірімізде қолдануға арналған діни дәстүр екендігін көреміз. Бес тараудан тұратын еңбектің бойында бүгінгі таңдағы оқырман қауымның көкейінде жүрген көптеген сұрақтарға жауап беретін, маңызды мәселелер кең көлемде қамтылған. Әсіресе, жастар арасындағы дінге деген ұғым түсініктің жаңсақ кеткен тұстарына орай, дәлелді тұрғыда жазылған ақиқат пен анық жағдаяттар көптің көңілінен шығары сөзсіз.Тұсаукесер рәсімінің құрметті қонақтары: Қарағанды қалалық №1 мешітінің бас имамы Құнанбаев Орманбет Болатұлы, Қарағанды облыстық дін істері агенттігінің бөлімше бастығы Тілекбаев Серік Қуатұлы, ҚарМУ ф.ғ.д. профессор Әбдуов Мұхаммедқали Ілиясұлы, қалалық ардагерлер кеңесінің төрағасы Зейнешов Тілеубек, Қарағанды облыстық мәдениет басқармасының бастығы Ағынбаев Еркебұлан Мүлікұлы және Еңбек ардагері Ислам Нұрғалиұлы Ақбасов жиналған қауымға, ұлттық дәстүріміз бен дініміздің ажырамас құстың қос қанаты іспеттес екендігін, түсіндіріп, өрелі сөз айтты. Әрбір мұсылман иман мен Ислам шарттарын орындауымен бірге кітапта келтірілген діни дәстүрлерімізді кең түрде қолданып отырса, екі дүниенің жақсылықтарына қолдары жетер деген сенімдеміз.

Тотия Енсебаева Қарағанды облыстық орталық мешітінің баспасөз қызметі