Қарағанды облысы, Нұра ауданы, Чербаков ауылында жаңа мешіт ашылып, ауыл халқын қуанышқа бөледі. Бұл әсем мешіт сырты ақталып іші айнадай жарқыраған шамдармен безендірілген. Имам бөлмесі, михраб, дәрісханалардан тұратын мешіт 100 адамға арналған. Мешіт Нығметов Сейітжаппар Алшынбайұлы және ауыл жамағатының көмегімен салынды. Ашылу салтанатына Қазақстан мұсылмандары діни басқармасының Қарағанды облысы орталық мешітінің найб имамы Жақия Мерей, Нұра ауданының әкімі Бексұлтанов Құдайберген Бексұлтанұлы қатысты. Алғашқы болып облыстың найб имамы Жақия Мерей жиналған жамағатқа Құран кәрім аяттарын оқып, мешіттің ашылу салтанатына келген көпшілікке мешіт салудың қасиеттерін айтты. Келесі сөз сөйлеген аудан әкімі Бексұлтанов Құдайберген Бексұлтанұлы ауыл жамағатын жаңа ашылған мешітпен құттықтап, ізгі тілектерін жеткізді. Салтанатты сәтте дәстүрлі әдіспен лентасы қиылып, шашуы шашылғаннан соң, мешітке жаңадан тағайындалған бас имам «Астана» медресесінің түлегі, Шахтинск қаласында найб имам қызметінде болған Жұмағұлов Рашид таныстырылды. Мешітке оң аяқпен қадам басқан жамағат сәні мен салтанаты келісті ғибадат орнына кіріп, ауыл ақсақалдары бата берді.