Мұхаммед (с.ғ.с.) Пайғамбарымыздың туған айы Мәуліт мерекесінің құрметіне арналып наурыз айының 16 күні М.Хамзин атындағы мәдениет сарайында Балқаш қалалық мешітінің ұйымдастыруымен «Ғаламның Рақым нұры» атты рухани салтанатты кеш өтті. Кешті көру үшін мәдениет сарайына келген жамағатта есеп жоқ. Қонақтарды қарсы алған ұлттық киімдегі оқушы балалар әрбір келген кісіге сәлем беріп, қолдарына бір-бір пакеттен ұстатып тұр. Келген көрермен жамағатқа жуырда ҚМДБ-ның төрағасы, Бас мүфти Ержан қажы Малғажыұлының бастамасымен ұлттық салт-сана мен асыл дініміздің тығыз байланысын баяндайтын «Дін мен дәстүр» атты құнды еңбек қалың оқырманға жол тартты. Осы «Дін мен дәстүр»  400 дана, 100 дана «Пайғамбарымыздың өмірі», 100 дан «Пайғамбарымыз жайлы 101 сұрақ», 50 дана «Дін мен діл», Ақида жайлы уағыз диск бейне фильмдер таратып, 2014 жылдың күнтізбесі және 550 дана жеті құрмадан салынған қорапшаны алған жамағат асыға басып көрермендер залына қарай өтуде. Залдың ішіне кірген бойда ойнап тұрған діни әуендерге ұйып, тамаша бір тәтті сезімге бөленіп қалдық. Фанфары ойнаған мезетте жарық шамдары сөндіріліп, зал іші сілтідей тына қалды.

Қуандық МАҚСҰТҰЛЫ Құран сүресі оқылып, Мұхаммед пайғамбардың дүниеге келуімен адамзат баласының қараңғылықтан құтылғанын және тура жолға түскенін баяндайтын деректі фильмнің көрсетілімінен соң, кештің алғашқы құттықтау сөзі Қазақстан Мұсылмандары Діни Басқармасының Қарағанды өңіріндегі өкілі, Қарағанды орталық мешітінің бас имамы Ө.Қ. Бекқожаға берілді. Балқаштықтарды Мәуліт мерекесімен құттықтаған Өмірзақ Қазкенұлы ҚМДБ құттықтауын жеткізе отырып, Балқаш қалалық мешітінің 2013 жылғы атқарған жұмыстарына тоқтала кетті және оған оң баға берді. Сөзін аяқтай келе, балқаштықтарға Алланың тура жолын нұсқап, Пайғамбардың өсиет хадистерін дұрыс мағынасында уағыздап жүрген, сонымен біргемұсылман жамағатты ынтымақ пен бірлікте өмір сүруге шақырған және мешіттің барлық жұмыстарын осы мақсатқа жұмылдыра білген бас имам Марат қажы Құрбанбекұлы Аманжоловқа Алғыс хат тапсырды. Кешті көруге жиналған қауымға Балқаш қаласы әкімінің құттықтау хатын әкімдіктің өкілі Елемес Қасқырбайұлы Түсіпбеков жеткізді. Бұдан соң ақ жаулықты әжелер Мәуліт мерекесінің құрметіне шашу шашып, Алматыдан арнайы келген Ербол Шакратұлы және Балқаш қалалық мешітінің наиб имамы Асылхан Түсіпбеков пен Балқаш көп салалы колледжінің студентері Пайғамбарға салауат оқыды. Мәуліт мерекесіне облыстық және республикалық жыр мүшәйраларының жүлдегері ақын Нұрдос Кәрім арнау өлеңін орындап берсе, Аманжол Шаймерденов пен Айгүл Жарова күйден музыкалық тарту жасады. Мұсылман жамағаттың көзіне жас үйірген «Соңғы мүмкіндік» атты монолог та әсерлі шықты. Оны орындаған рухани кештің арнайы қонағы болып келген Теміртау қалалық мешітінің шәкірті Абай Ясырұлы. Білім мен бірлік алауыздыққа қарсы. Осы ұғымдардың мәні мен мағынасы дінтанушы, ҚМДБ ақпарат насихат тобының жетекшісі Рүстем Сыздықовтың сөзімен әсерлі әрі барлық жиналған қауымға түсінікті тілде жеткендей. Залдың ықыласы ерекше болғанын қаттырақ соғылған шапалақтың өзі-ақ аңғартқандай. Жергілікті өнерпаз әншілер квартеті орындаған діни ән мен көп салалы колледж студенттері оқыған ақын ғұламалардың өлең жырлары да кеш мазмұнын түрлендіре түсті. Рухани салтанатты кештің соңында Өмірзақ Қазкенұлы мен Марат қажы Құрбанбекұлы мерекенің жоғары деңгейде өтуіне белсене қатысқаны және атсалысқаны үшін біраз азаматтарға ризашылықтарын білдіріп, алғыс хат тапсырды. Осындай ыстық ықылас пен ризашылық сөздерін қала әкімдігіне де жолдады. [gallery link="file"]

---