Қарағанды облыстық орталық мешітінде аудан, қала имамдарының басын қосқан алқалы жиын жиі өтіп тұрады. Бұл өз кезегінде имамдардың жауапкершілігін арттырып, өз жұмысына деген ынтасын күшейтуге септігін тигізеді. Жылдың басы көктемгі қауырт мезгілде сан-салалы жұмыс кезек күттірмей тиянақты орындауды талап етеді. Осыған орай, бүгін наурыз айының 18-ші жұлдызында Қарағанды облысы әкімінің орынбасары Бейсенбай Жұмабеков Қуанышұлы, Дін істері агенттігінің төрағасы Қайрат Нүркенов, Қарағанды Жезқазған аймақтарына қарасты қала аудан мешіттерінің имамдары облыстық орталық мешітке ат басын тіреді. Басқосуда көтерілген басты мәселелердің бірі – Елбасымыздың «Мәңгілік ел» жолдауына сәйкес, бірлігімізді, ынтымағымызды нығайтып, әкімшілік пен имамдар бірлесе жұмыс атқару. Бірлесе пішкен тоң, ешқашан келте болған емес. Көптен шешімін таппаған мешіттердің материалдық, коммуналдық жағдайлары бір жүйеге келетін болады. Сәуір айының соңына дейін шұғыл мәселелерді кезекті күттіртпей орындап, ай соңында кезекті жиналыс ұйымдастырып, әр имам өз тарапынан қандай істер атқарылғандығы жайында есеп беретін болса, айтылған сөздің далада қалмасы анық –десті. Сонымен қатар, облыс әкімінің орынбасары Бейсенбай Жұмабеков жиналыс барысында имамдарға жалақы тағайындалатындығын да тілге тиек етті. «Жақсының жақсылығын айт, нұры тасысын» демекші, ҚМДБ-ның Қарағанды өңірі бойынша өкіл имамы Бекқожа Өмірзақ Қазкенұлы өз кезегінде атқарылған істердің нәтижелерімен бөлісті. Атап айтсақ, уағыз-насихат жұмыстары бойынша атқарылған кездесулер, облысымыздың барлық мектептерінде жат ағымдардың алдын-алу мақсатында профилактикалық кездесулер, Жалпы және жастар бөлімі бойынша студенттер арасында конференциялар өткізу, жергілікті имам-молдалардың білімін жетілдіру мақсатында облыс және аудан деңгейінде семинар-тренингтер өткізу. Атқарылған тапсырмалардың сапасына көңіл бөле отырып, аудан имамдарын Алғыс хаттармен марапаттады. Сонымен қатар, өкіл имам өз тапсырмасының тиянақты орындалуын, имамдардың әдепке сай ұқыпты киініп, халықпен көркем тіл табыса білуін, ағымдағы ҚМДБ тарапынан берілетін іс шаралардың дер кезінде орындалып, дінге адал қызмет етуді жүктеді. Қала аудан имамдарының басын қосқан отырыс - үлкен жауапкершілікті арқалатқан, ел тыныштығы мен бейбітшілігін сақтауда жасалар жұмыстың көптігін сезіндірді.

Тотия Енсебаева Қарағанды облыстық орталық мешітінің баспасөз қызметі