Ислам туралы ақпараттың ашықтығына қарамастан, қазіргі уақытта бұқаралық ақпараттық науқандар, сансыз лаңкестік әрекеттер оның террористер діні ретіндегі беделін қалыптастыру бойынша өз міндеттерін атқара алды. Барынша радикалды ағымдар рухани құндылықтан жұрдай нағыз лаңкестер үшін құрал ғана. Мемлекеттің терактілерге реакциясы аяғы байланып, тамағына пышақ кезегенде аянышты үн шығарып, шошитын қой сияқты болмауға тиіс. Өйткені миллиондаған адамның тыныш ұйқысы мен мыңдаған жанның өміріне қауіп төнеді. ҚР-да терактілердің алдын алу бойынша нақты шараларды қолға алмасақ, етке сойылатын қойдың күйін кешеміз. Заманымыздың дертіне айналған осы тақырып аясында Қарағанды облыстық орталық мешітінің найб имамы Қосмағамбетов Бекболат наурыз айының 18-күні Қарағанды Сұрыптау кентінде Теміржол бөлімінде уағыз-насихат жұмысын жүргізді. Қос діннің өкілі жиналған басқосуда терроризммен күресу жайлы тереңінен талқыланды. Түрлі ағымдардың әкелген залалдары және олардан арылу туралы уағыз жүргізіп, көкейкесті сұрақтарға мардымды жауап берілді. Айналамызда тісі мен тырнақтарын қайрап тұрғанда, біздің басқаға үміт артпай алдын-алу шараларын жасағанымыз дұрыс-ақ.

Тотия Енсебаева Қарағанды облыстық орталық мешітінің баспасөз қызметі