Қай дәуірде болмасын қоғам үшін маңыздылығын жоймайтын тақырыптардың бірі – бала тәрбиесі. Әсілі, бала тәрбиесі отбасының тектілігін көрсететін құндылық қана емес, ұлт һәм адамзат болашағы үшін де аса өзекті мәселе. Осыған орай, Саран қаласының Ақтас кентінде мектеп оқушыларымен мазмұнды кездесу өткізілді. Саран қаласының бас имамы Мұқаметқали қажы төл дініміз ислам қағидаларын қазақи дәстүрімізбен сабақтастыра отырып тартымды уағыз айтып оқушылардың сұрақтарына жауап берді. Пайғамбарымыздың (с.ғ.с.) хадисінде: «Адам жақсы көргенімен бірге болады» деген қағидасын түсіндіріп, жақсы мінез құлық, сабырлық, адалдық, бірлік пен татулық, имандылықтың шыңы деп, ұлы Мәшһүр Жүсіп бабамыздың өсиет сөзімен жалғастырды: Өнерге өзіңді – өзің ерте баулы, Жастықтың бір күн көшіп кетер аулы! Қауіп – қатерсіз, қайғысыз болам десең, Араз боп еш адаммен болма даулы Деп ұлы бабамыз айтқандай татулық пен бірлік бейбіт өмірдің кепілі екенін түсіндіріп жастарға бата берді.