Көктемгі мезгілде кезек күттірмейтін көп шаруаның бірі – тазалық жұмыстары екендігі белгілі. Алдымен үй-ішінің тазалығын ескерген қазақ халқы «кіретін босағаның тазалығынан сол үйдің тазалыққа қаншалықты мән беретіндігін» байқаған. Сондықтан мұсылман әдебінде рухани тазалықпен қатар, аула мен айналаның таза және ұқыпты болуына мән берілген. №1-мешітінің жанындағы діни сауат ашу курсында тәлім алып жүрген қыз балалардан құралған бір топ шәкірттер бір Алланың разылығын ойлап, ерікті түрде мешіттің ішкі тазалық жұмыстарына қолғабыстарын тигізді. «Тазалық – иманның жартысы» деген хадисті жадыларына тоқыған шәкірттер сауапты істің ізгілігін арттыру мақсатында, алдағы күндері жекелеген қарт отбасыларына да осындай қолынан келген көмектерін жасау үшін өзара ақыдасып, мешіттің кітапханасында бас қосты.