Қазақстан мұсылмандары діни басқармасы 2014 жылдан бастап үш бағыт бойынша жұмыстарға басымдық берді. Соның бір бағыты қайырымдылық шаралары еді. Осы басымдық берілген үш бағыт бойынша жұмыс жасап, Балқаш қалалық мешіті қайырымдылық шараларын жасауды алға мақсат тұтып, бүгін сәуір айының 7-сі күні қаламыздағы мүмкіндіктері шектеулі балалардың даму орталығы «Үлкен жүрек» қоғамдық бірлестігіне көмек көрсетті. Бұл орталықта мүгедек, іс-қимылы, ой-санасы дамымай қалған қала бойынша 95 бала тәлім-тәрбие алады. Осы орталыққа көмектесу мақсатында мешітіміздің жамағатымен бірлесе отырып жүз алты мың тенге көлемінде жиналған қаражатқа балаларға арналған түрлі ойыншықтар, атап айтар болсақ, «умные игрушки» деп аталатын ойыншықтарды қалалық мешітіміздің бас имамы Аманжолов Марат қажы, найб имамдар Тусупбеков Асылхан қажы және Ақбанов Нұрхан арнайы барып, сыйға тартты. Балалардың ой өрісінің дамуына септігі тиетін осындай ойыншықтар сыйға тартқаны үшін өз ризалығын білдірген орталық басшысы Денисова Людмила Иванқызы мешіттің бас имамы Марат қажыға балалар қолынан шыққан тоқыма сурет және алғыс хат тарту етті. Қайырымдылық - ізгіліктің көрінісі Алдағы уақытта да мұндай игі шаралар жалғасын тауып, көмекке мұқтаж жандарға демеу болу міндетіміз деп білеміз.