Сәуірдің 11-жұлдызында Осакаровка ауданы Қарағайлы аулына Теміртау қалалық мешітінің бас имамы Амантай Естай кезекті уағыз-насихат сапарымен барып қайтты. Ондағы жиналған жамағатқа «қияметтің кіші белгілері» жайында уағыз айтып, жұма намазын өткізді. Тағы бір айта кетерлік жағдай, биылғы күннің бірден жылынуы Қарағайлы ауылының тұрғындарына да кері әсерін тигізбей қоймапты. Амантай Естай уағыз сапарымен барған ауылды да топан су басып, бір қанша үйлерді су шайып кеткенінің куәсі болдық. Осыған байланысты имам Естай уағыз соңында ауыл халқын сабырға шақыра отырып, мұның бәрі Алладан болған ескерту, сынақ екеніне тоқтала келе адамның басына келген үлкенді-кішілі сынаққа мұсылман баласы тек сабырмен қарау керек екенін түсіндіріп берді. Сонымен қатар үй-жайынан айырылған тұрғындарға жұбату айтты. Намаз соңында ақсақалдарымыз имамға ақ батасын беріп, өз ризашылықтарын білдірді. Кейіннен жамағат осындай әсерлі уағыздың жиі болып тұруын өтінді.