Дінбасымыз Ержан қажы Малғажыұлы хазіреттің үстіміздегі жылды «Дін мен дәстүр» жылы деп жариялауына байланысты бала тәрбиесіне қатысты қазақы қағидаларды дәріптеу мақсатында бас имам Орманбет қажы Болатұлының ұйымдастыруымен тәрбиелік іс-шара аталып өтті. «Бала тәрбиесі бесіктен басталады» тақырыбымен өткен шараның мақсаты - дін мен дәстүрдің байланысын арттырып, ақжаулықты аналарымыздың ақыл кеңестерін тыңдай отырып, ұмытылып бара жатқан салт дәстүрімізді жадымызда жаңғыртып, күнделікті тұрмыс тіршілігімізге айналдыру. Оған өмір тәжірибесі мол қажы апалар мен Қарағанды қалалық мешітінің №1-мешітінің жанындағы қыз балаларға арналған діни сауат ашу курсының шәкірттері қатыстырылды. №1-мешітінің ұстазы Бақытгүл және үздік шәкірт Айшаның жетекшілігімен өткен тәлімді кеште сәбидің дүниеге келуіндегі атқарылатын рәсімдерден бастап бала денсаулығы мен тәрбиесіне қатысты жайттар кеңінен қамтылды. Халқымыз бала тәрбиесіне өте қатты мән беріп «Балалы үй базар» деп ұрпақтың көп болуын, оның саналы, тәрбиелі болып қалыптасуын ертеден қолға алған. «Бала тәрбиесі бесіктен басталады» деген ұлағатты сөзді айтуы да осының дәлелі. Қазақтың этнографиялық әңгімесінде: Баласыз жан – мүлдем сөнбек, Бір балалы үй- сынып қалар көнек. Екі балалы үй- ащы-тұщщы кермек. Үш балалы үй – бала-шаға ермек. Төрт балалы үй – асу бермес дөңбек. Бес балалы үй – бір-біріне көмек. Алты балалы үй – алтын жіпті өрмек. Жеті балалы үй – абыр-сабыр еңбек. Сегіз балалы үй – Құдай бәрін бермек. Тоғыз балалы үй – рахат өмір көрмек. Он балалы үй – бір ауыл боп өнбек. Он бір балалы үй – ел «шіркін-ай» демек. Он екі балалы үй – өз-өзіне әбден сенбек, деген өлең жолдары ардақты пайғамбарымыздың (с.ғ.с) «Үйленіңдер, ұрпақ көбейтіңдер. Мен қияметте үмметіңнің көптігімен мақтанамын» деген хадисін кеңінен түсіндіріп тұрғандай. Дініміздің қағидасында баланы құрсақтан бастап тәрбиелеуді міндеттейді. Болашақ ананың аяғы ауыр кезінде ауыр зат көтертпей, көңіліне қаяу түсіретін келеңсіз жайттарды болдырмау (ұрыс-керіс), харам астан абай болу секілді ережелерді қатаң сақтаудың мақсаты баланы іштен тәрбиелеу болып есептелген. Сонымен қатар, бала туылғанда кіндігін кескен пышақпен табалдырықтың астын қазып, баланың жолдасын сол жерге көмген. Себебі, баланың жолдасын кез-келген жерге тастап аяқ асты болса, аң-құс жейтін болса баланың мінез-құлқына керіс әсер етеді деп түсінген. Сондықтан оны (баланың жолдасын) қадірлеп босағаның астына көміп тастаған. Бір жағынан табалдырықты баспа, босағаны керме деген тиымдар да осыдан туындаған. Одан кейін бұрынғы уақытта ата-бабаларымыз майшаммен күн көрген. Кешке баланы бесікке бөлейтін кезде сіріңке жағып, бесіктің ішін қарап құрт-құмырсқа секілді жәндіктердің баланы шағып алмауы үшін қадағалайтын болған. Бірақ бұл күнде сол әдетті бесікті аластау деп түсініп жүргендер бар. Сонымен қатар, сүйінші сұрау, азан айтып ат қою, қалжа, тахник жасау, қырқынан шығару, бесікке үкі тағу, түсаукесер секілді көптеген салттардың мән жайы мен мақсаты саналы түрде түсіндірілді. Қажы апалар да өз кезегінде болашақ ана болатын қыз балаларға бесікке бөлеудің тәртіптерін іс жүзінде көрсетті. Наиб имам Мұсағали Аясұлы осы сәтті ұтымды көрсетіп Алланы ұлықтап азан айтып сәбиге ат қойды. Дін мен дәстүрдің сабақтастығын түсіндіріп, дінбасы кітабынан үзінді келтірді. «Ел болам десең, бесігіңді түзе» деген нақылды жастарымыздың санасына қалыптастыра отырып, саналы ұрпақ болып тазалық пен тектілікті сақтауды айналамызға насихаттап жүруге үндеді. Бас имамның бастамасымен өткізілген осындай тағылымды іс-шаралар алдағы уақытта жалғасын табатын болады.