Қазақстан мұсылмандары діни басқармасының төрағасы Ержан қажы Малғажыұлы Астанада өткен халықаралық конференцияда ХХІ ғасыр – ақпараттың дамыған дәуірі екенін, Ислам жақсылық жолында пенденің заманмен бірге дамып, өркендеп отыруын қолдайтынын мәлімдеді.

Бас мүфти Орталық Азияның дінтанушы-ғалымдарына ақпарат кеңістігін қамту мақсатында бәсекеге қабілетті сайт, газет-журнал ашып қана қоймай, «Ислам кинолары мен мультфильмдерінің фестивалін» ұйымдастыру ұрпақ тәрбиесі үшін ұтымды болатынын айтты. «Адамды ізгілікке үндейтін телетуындылардың берері мол», – деді ҚМДБ төрағасы.

Ержан қажы Малғажыұлы Қазақстан мұсылмандары діни басқармасы Әбу Ханифа атындағы ғылыми-зерттеу Ислам орталығын ашуды жоспарлап, бүгінде осы орталықтың жұмыс жүйесін жіті зерттеп жатқанын жеткізді.

«Ғылыми орда Ислам білімі мен ғылымын дамыту бағытында құнды дүниелер мен жазбаларды аударып, жаңа кітаптарды шығаруды көздейді. Солардың қатарында Орталық Азия ғұлама-ғалымдарының еңбектері де халыққа ұсынылмақ», – деп түйіндеді сөзін Бас мүфти.

www.muftyat.kz