Көркем мінездің ажырамас бөлігі- жомарттық. Жаратушымыз көптеген аяттарда мұсылмандарды жомарттыққа, дін жолында жарысып жақсылық жасауға шақырады. Құранда пенде өз ризығынан басқа пенделерге де үлес беру керектігін ескертеді. Жомарттықтың қиямет күнінде адамды түрлі қиындықтан, азап пен өкінуден құтқаруға себеп болатыны да айтылады. Алла үшін жұмсалған дүние-мүлік ақыретте сан есе артық болып қайтарылады. Міне, мейірімі шексіз Алла адамдарды осындай мол табысқа жеткізетін абзал амалға шақырып, жомарттыққа ынталандырады. Осы орайда №1-мешітінің тарапынан шынайы мұқтаж болған жандардың отбасына арнайы зиярат жасап, оларға материялдық көмек көрсетумен қатар, рухани дем беріп, қол көмек жасау игі іске айналды. Майқұдықтың 16-шы ықшам ауданының тұрғыны жалғызбасты мүгедек ананың отбасында болған мешіт қызметкерлері азық-түлікпен, киім-кешекпен, қаржылай көмек көрсетіп қана қоймай, үй-ішінің тазалық жұмыстарын жасап берді. Сауапты амалды орайын келтіріп жасауға дағдыланған №1-мешіттің бас имамы Орманбет қажы мен мешіт ұжымына алғысын білдірген отанасы мейірімділік пен жомарттықтың жоғалмайтындығын айтып ағынан ақтарылды. Жылы сөйлеп, жабырқаған жанның жанынан табыла білу мұсылманның көркем мінездерін толықтыра түсетіндігі ақиқат.