Ағымдағы жылдың 17-ші сәуір күні Қарағанды облысы Балқаш қаласының мешітінің бас имамы Аманжолов Марат қажы Қарағанды қаласында болып жергілікті «5-канал» телеарнасына «Әмір мағрұфпен нәһи мүнкәрдің пайдалары» атты бейне уағыз айтты. Алла Тағала Кәләм шәріпінде: «...Жақсылыққа, тақуалыққа жәрдемдесіңдер. Күнәға және дұшпандыққа жәрдемдеспеңдер. Алладан қорқыңдар! Күдіксіз Алланың азабы қатты» («Маида» сүресі, 2-аят),– деп қатаң ескертеді. Пайғамбарымыз (с.ғ.с.) хадис шәріпінде: «Кім бидғат (шариғаттан тыс) жолдағы әрекетке қарсылық етсе, Алла Тағала оның жүрегін өз ықпалына алып, оны иман нұрына толтырады. Кім бидғат етушіге қарсы шықса, Алла оны қиямет күнінің қорқынышынан сақтайды. Кім бір адамды жақсылық жолына салып, жамандықтан қайтарса, ол Алланың, Алла кітабының және Расулының (с.ғ.с.) жер бетіндегі халифы болады»,– деген. Мұсылман бауырларды жақсылыққа шақырып, жамандықтан тыю жайлы болған бейне уағыздан жұртшылық өз керегін естіп, қателік-кемшіліктерін түзеуге бет бұрады деп сенеміз. Сондай-ақ Ақпараттық насихат тобының мүшесі Марат қажы Құрбанбекұлы 18-ші сәуір күні Шет ауданы Жұмыскер ауылы мешітінде «Жалған пайғамбарлар» жайында жұма уағызын айтып, жұма намазын өткізді. Сол жердегі мектеп оқушыларымен, қарияларымен кездесіп түрлі діни сауалдарға жауап беріп, уағыз-насихат жұмыстарын жүргізді. «Алдағы уақытта мұндай игі жұмыстардың жалғасын табуына ат салысып, Жаратушы иеміз ісіңізге береке берсін»- деген ақсақал-қарттардан бата алып, ыстық ықыласына бөленіп қайтты.