Center Image
IHSAN.KZ
«Бірлігі жарасқан жамағат» жарысы өтті

Бүгінде діни қызметкерлердің ұйымдастыруымен спорттық ойындар жүргізіп жамағат арасындағы бірлікті бекемдеу дәстүрге айналып келеді. Осындай мақсатта Қарағанды қалалық №1-мешітінің бас имамы Орманбет қажы Болатұлы қалааралық мешіттер арасында футболдан сайыс ұйымдастырып, оған облыстық орталық мешіті, Балқаш, Саран, Шахтинск, Сұрыптау, Теміртау, Бала қажы мешіттерінің имамдары мен жамағаттарын шақырды. Ойын алаңында уақытылы жиналған командалар сап түзеп еліміздің рәміздеріне құрмет көрсетіп, әнұран орындалды. Сайысқа тыңғылықты дайындық жұмыстарының нәтижесінде арнайы төрешілер тартылды. Сайыс алдында бас имам Орманбет қажы жиылған жамағатты жігерлендіріп, құттықтау сөздермен бастап берді. Арнайы шақырылған қонақтар облыстық наиб имам Серік Құрманов, облыстық дін істер басқармасының бастығы Қайрат Нүркенов, қажылар қауымдастығының облыстағы төрағасы Қанат қажы Жылқыбаев игі тілектерін жеткізіп сайысқа сәттілік тіледі. Тартысты бәсеке кезең-кезеңімен алты сағатқа жалғасты. Нәтижесінде әділ төрешілердің шешімі бойынша І-ші орын Қарағанды облыстық мешітінің қанжығасына байланды. ІІ-ші орын Балқаш қаласының бас имамы бастап келген Марат қажының «Бірлік» командасына бұйырса, ІІІ-ші орын Сұрыптау кентінен келген жамағаттардың еншісіне берілді. Жүлдегерлерге бағалы кубок пен ақшалай сыйлықтар, дипломдарды құрметті қонақтар табыстады. 70-ке жуық қатысушыларға №1-мешіттің тарапынан арнайы аспаздарды жалдап ас даярланып, дастарханнан дәм берілді. Бас жүлде кубокты ұтып алған мешіт келесі ойын кезегін өткізуді жоспарлап, кубокты жылжымалы жүлде ретінде ұтысқа ие болған командаға өткізіп отыруға уағдаласты. «Қалауын тапса қар жанады» деген қанатты қағиданы жаңғыртып, мешіттердегі жамағаттардың арасын жақындастырып бірлікте болуға септігін тигізетін ойынды ұйымдастырған бас имам Орманбет қажыға әр тараптан келген мұсылман жамағаттары алғыстарын жеткізді. Салтымызды сақтап, ғұрпымызды құрметтеп жүрсін деген ниетпен облыстық мешіттің тарапынан тарту етілген «Дін мен дәстүр» кітабы қонақтарға таратылды.

[gallery link="file" ids="6065,6066,6067,6068,6069,6070,6071,6072,6073,6074,6075,6076,6077,6078,6079"] Қарағанды қалалық №1-мешітінің баспасөз қызметі

Мәзір
Сайт тілі
© 2009 – 2025 IHSAN.KZ | ҚМДБ Қарағанды облыстық «Әнет баба» мешіті Барлық құқықтар қорғалған. Ihsan.kz сайтында жарияланған кез келген материалды көшіру, тарату немесе басқа сайттарға орналастыру кезінде Ihsan.kz сайтына сілтемені міндетті түрде көрсетуді сұраймыз.

© 2025 Сайтты әзірлеген - abir.kz