Қазақстан халқының бірлігі күні қарсаңында Қарағанды қаласындағы №1 мешіттің ұйымдастыруымен облыс мешіттерінің арасында футболдан жарыс өтті. Теміртау, Саран, Шахтинск қаласындағы, Сұрыптау станциясындағы мешіттермен қоса, бұл жарысқа Қарағанды қаласындағы үш мешіттің және Балқаш қалалық мешітінің командасы қатысты. Мешіт пен жамағаттың арасын жақындатып, халықтың бірлігін жарастыруды мақсат еткен жарыстың тағы бір ерекшелігі – командалар құрамында міндетті түрде мешіттердің бас имамдарының болуы талап етілуінде. Мешітке келіп жүрген жамағаттардан жасақталған Балқаш қаласының командасын бас имам Марат қажы Аманжоловтың өзі басқарып барды. Балқаш командасы бірінші ойынды Шахтинск мешітінің командасымен өткізіп, оларды 3:2 есебімен жеңді. Екінші ойын да жеңіспен аяқталды. Бұл жолы балқаштықтар Сұрыптау станциясындағы мешіт командасымен ойын алаңына шықты. Ойын 2:0 есебімен Балқаш командасының пайдасына шешілді. Балқаштықтардың Қарағанды қалалық мешітінің командасымен өткізген үшінші ойыны тең аяқталды. Алайда біздің қаламыздың командасы жеңіске үміттілердің қатарына қосылып, ақтық ойынға жолдама алды. Бірінші орынға таласқан екі команда болатын. Олар – облыстық мешіт пен Балқаш қалалық мешітінің командалары. Екеуінің жеңіске ұмтылған тартысты ойыны 2:0 есебімен аяқталып, І орынды облыстық мешіттің командасы алып кетті. Балқаш командасы тиісінше ІІ орынды иеленді. Сегіз команданың арасынан жүлделі орынға ие болу – үлкен жеңіс. Мешіт командасын лайықты жеңісімен құттықтаймыз!