Сәуір айының 26-жұлдызында ҚМДБ-ның Қарағанды өңірі бойынша өкіл имамы Бекқожа Өмірзақ қажы Қазкенұлының тікелей тапсырмасымен, №1 қалалық мешіттің ұжымы облыс мешіттерінің қызметкерлері мен жамағаты арасында үлкен футбол ұйымдастырды. Күн жылынып, жер кеңи бастағанда облыстық мешіттер арасында футбол ойынын ойнап, жастардың спортқа деген қызығушылығын ояту жылдағы дәстүр ретінде қалыптасқаны қашан. Cенбі күні өткен футболда Қарағанды облыстық орталық мешітінің ұжымы, №1 қалалық мешіті, «Балақажы» мешіті, Теміртау мешіті, Шахтинск мешіті, Сұрыптау мешіті, Балқаш орталық мешіті және Саран мешіті бақ сынасты. Жарыс болған соң, жеңіс те жеңіліс те болады. Аталмыш ойында үздік ойын көрсетіп, топтан озып шыққан облыстық орталық мешітінің командасы жеңіске жетіп, қанжығасына 1-орынды байлап қайтты. 2-орынды Балқаш қаласының орталық мешітінің ұжымы иеленсе, 3 пен 4-орындар Сұрыптау мешіті ұжымы мен Шахтинсктен келген мешіт қызметкерлеріне тиесілі болды. Салауатты өмір салтын ұстануға шақырып, жастарға дұрыс бағыт-бағдар беру мақсатында ұйымдастырылған футбол жарысына қарағанда «доп ойнаған тозар» деген сөз мүлдем келіспейді, керісінші қазіргі таңда доп ойнаған озатын болар.

[gallery link="file" columns="4" ids="6087,6090,6091,6092,6093,6094,6095,6096,6097,6098,6099,6101,6102,6103,6104,6105,6106,6107,6108,6109,6110,6111,6112"]

Қарағанды облыстық орталық мешітінің баспасөз қызметі Тотия Енсебаева

---