Бүкіл ғылым атаулы діннен қуат алатынын, дін арқылы өсіп-өркендеп жетілетінін білген ақиық ақын Мұқағали «Дін – ғылымның анасы» деп жырлаған. Ең алғашқы білімді Алла тағала Адам атамызға үйреткен. Қасиетті Құран Кәрімде: «Алла Адамға (а.с) бүкіл атауларды үйретті» деген аят бар. Осы аят жалғасында Жаратушы иеміздің Адам атамызға періштелердің білмеген нәрселерін үйреткені айтылады. Тәпсіршілер «бүкіл атаулар» дегенді барша материалдық заттар, өсімдіктер, жан-жануарлар, табиғи құбылыстар, дүниені құрап тұрған барша нәрселер деп түсіндіреді. Яғни, Адам атамыз солардың бәрін білетін ғалым болған. Одан соң бұрынғы барша пайғамбарлар да өз қауымдарына қажеттіліктеріне қарай әр нәрсенің мәнін түсіндіріп отырды. Ардақты Мұхаммед (с.ғ.с) пайғамбарымызға дейін сол пайғамбарлар керуені жалғасып келді. «Көш жүре түзеледі» деген халық даналығы бар. Осы орайда №1-мешіттің кітапханасында «Ілім жолы – жәннат жолы» атты рухани танымдық кеш өтті. Оған кітапхана оқырмандары мен қыз балаларға арналған сауат ашу курсындағы шәкірттер қатыстырылды. Шара барысында діни ілім алудың екі дүниедегі пайдасы мен Құран Кәрімдегі «Білетіндер мен білмейтіндер тең ба?» деген аяттың мағынасы ашықталды. Үздік шәкірт Айша Қарабаеваның ҚМДБ-ның ресми саитынан ықшамдап, заманға лайық дайындаған ілімге қатысты слаидтары көрсетілді. Хақ жолдан адаспай жүру үшін «Адасқандар» деректі бейнефильмі қойылды. Ұстаз Бақытгул тақырыпқа қатысты баяндама жасап, жақсылыққа шақыру мен жамандықтан қайтарудың өзінде білімнің қажеттілігін алға тартты. Отырыс соңы еркін сұхбатқа ұласты. Бұл игі шара дінбасымыз Ержан қажы Малғажыұлы хазіреттің талап етіп отырған оқу-ағарту мен үгіт-насихат жұмыстарына басымдық беру аясында бас имам Орманбет қажының басшылық етуімен атқарып отырған маңызы бар іс. Себебі, жастарымызды көзі ашық, көкірегі ояу, саналы, парасатты етіп тәрбиелей отырып, дін мен қоғам арасын алшақтататын емес, дін мен қоғам құндылықтарын қатар ұстанатын кемел тұлғаларды қалыптастыру болып табылады.