Қазақстан мұсылмандары діни басқармасы ұйымдастырған республикалық «Ислам және дәстүр» атты шығарма бәйгесінің жеңімпаздары Бас мүфти Ержан қажы Малғажыұлының қолынан жүлделерін алды.

Салтанатты шараның ашылуында сөз алған Бас мүфти жеңімпаздарды жүлдесімен құттықтап, алғыс хатпен марапаттады.

«Байқауды өткізудегі мақсатымыз – бұқаралық ақпарат құралдары арқылы дін мен дәстүрімізді барынша насихаттау. Осы үздік мақалаларды жинақ етіп шығаруды жоспарлап отырмыз. Бұдан бөлек «Дін мен дәстүр» жылы аясында жамағат арасында спорттық жарыстар ұйымдастырылады. Тарихи мешіттер жайлы деректі фильмдер түсіру де ойымызда бар», – деді Ержан қажы Малғажыұлы.

ҚМДБ Аппарат жетекшісі Ғылымбек Мәжиев жеңімпаздарды анықтауда әділқазы мүшелерінің жұмысы жайлы баяндап, бағалау барысында шығарма авторы жайлы мәлімет берілмей, шифрлық негізде жүзеге асқанын жеткізді.

Марапаттау рәсімін жүргізген ҚМДБ Уағыз-насихат және ғаламтормен жұмыс бөлімінің меңгерушісі Ершат Оңғаров «Ислам және дәстүр» байқауына қаржылай демеушілік көрсеткен «Нұр-Қазақстан» және «Атлас» қажылық компаниясының басшыларына алғыс білдірді.

Салтанатты шара соңында жүлде иелері Бас мүфтимен естелікке суретке түсті.

www.muftyat.kz