Елімізде аталып өтетін өзіндік орны бар мерекенің бірі – Ұлы Жеңіс күні. Бұл күн - аға ұрпақтың Ұлы ерліктерін есте сақтауға арналған мәртебелі мереке күні. Яғни, аға буын өкілдерінің жанқияр ерлігі мен еселі еңбегінің жемісі. 1941 жылы басталған сұрапыл соғыстың аяқталғанына биыл 69 жыл болды. Сол жылдың маусым айынан бастап миллиондаған әскермен бірге қазақ жерінің жауынгерлері де Ұлы Отан соғысына аттанып, өзінің батылдығымен, қайсарлығымен көзге түсіп, жеңіске жетуге елеулі үлес қосқан еді. Сондықтан бұл мереке – біздің аталарымыз бен әжелеріміздің батырлықтары мен жанқиярлықтары, олардың өз Отанына деген шексіз сүйіспеншіліктері Қазақстанның бүгінгі жауынгерлері үшін мақтан тұтарлық үлгі ғана емес, бұл – бірнеше ұрпақты байланыстыратын қоғамның рухани дамуы мен ұлттық қайта өрлеудің жоғары адамгершілік негізі. Жеңіс күні – абыройымыз бен даңқымыздың мерекесі. Ешқашанда жауынгер ерлігі мен жеңісті еңбегімен жақындатқан еңбешінің ерліктері ұмытылмайды. Осы мақсатта ҚМДБ-ның Қарағанды өңірі бойынша өкіл имамы Өмірзақ қажы Қазкенұлының жүктеген тапсырмасын басшылыққа алып Қарағанды облыстық «Зекет» қоры қаладағы алты ардагердің отбасында қонақта болды. Қордың директоры Бабағалиев Базарбай Ағылманұлы ардагерлерді төл мерекелерімен құттықтап, ақшалай сыйлықтар үлестірді. Жаңа туынды «Дін мен дәстүр» кітабы мен орыс тіліндегі діни әдебиеттерді тарту етті. Қаламыздағы соғыс және тыл ардагерлеріне көрсетілген құрмет қайырымдылықты қалт жібермейтін «Зекет» қорының іс-шарасымен қорытындыланды.