Ислам үнемі жетім балаларға қамқор болуға, олардың ақысын жемеуге, бастарынан сипап желеп-жебеп жүруге бұйыратын дін. Сонау он екі ғасырдан бері Ислам дінін ұстанып келе жатқан ата-бабамыз да «Жетім көрсең, жебей жүр» деп осы тәрбиені ұрпақтан ұрпаққа жалғастырып келеді. Құран кәрімнің көптеген аяттары мен Пайғамбарымыздың хадистерінде жетіммен қарым-қатынас жайы сөз болған. Мәселен, «Ниса» сүресінің 36-аятында Алла тағала жетімдерге қамқор болуды, Аллаға серік қоспай құлшылық ету, ата-анаға жақсылық жасаумен бір қатарда келтірген. Олай болса, мұсылман адам жетімнің жайын көп ойлап жүруі тиіс. Сонымен бірге «Бір жетім дастарханда елмен бірге отырса, олардың дастарханына шайтан жоламайды.» деген де хадис бар. Мамыр айының 11-ші жұлдызы «Бала қажы» мешітімізге Балалар үйінің жасөспірім жастары келіп, Аллаһтың үйімен танысып қайтты. Наиб имам Түсіпбекеов Ерлан Сәрсенұлы жастарға Ислам Дінінің жалпы құндылықтары туралы біраз уағыз насихат жеткізді. Әркімді қуанту сауап, бірақ жетімді қуанту одан да үлкен сауап. Әркімді ренжіту күнә, ал жетімді ренжіту одан үлкен күнә. Әркімнің мүлкіне әділетсіз түрде қол салу, ақысын жеу харам, бірақ жетімнің ақысын жеу одан да үлкен күнә болады. Аллаһ Тағала сауапты істерге амал етуге жазсын.