Дүйсенбі күні Саран қаласының мешітінде қала жастары және оқушылармен рухани кездесу өткізілді. Қазақстан Мұсылмандары Діни Басқармасының төрағасы, Бас мүфти Хазрет Ержан қажы Малғажыұлының «насихат – тәрбиенің басты тірегі» деген ұсынысын қолдай отырып және Қарағанды облысының өкіл имамы Өмірзақ қажы Қазкенұлының барлық мешіттерге қойған талабын іске асыру жолында жастарға ислам қағидалары түсіндіріліп тартымды уағыз айтылды. Бас имам Мұқаметқали қажы жастарға ата-ананы сыйлау, үлкенге құрмет, кішіпейілдік, қарапайымдылық, мейірімділік иманнан деген тақырыпта исламның мазмұнын түсіндірді. Әр жерде кездесіп қалатын керітартпа ағымдардан сақтану жолдарын түсіндіріп сұрақтарына жауап берді. Пайғамбарымыздың өмір тарихынан уағыз айтып бабаларымыздың өсиеттерін жеткізді. Мәшһүр Жүсіп бабамыз: Ай қараңғы, күн бұлт, түн демеңіз, Біреу жарлы, біреу бай, күндемеңіз. Ата тілін алмаған арам ұлды, Аузы түкті кәпірден кем демеңіз. Ай қараңғы, күн бұлт: түн демеңіз, Біреу жарлы, біреу бай, күндемеңіз. Ата тілін сыйлаған халал ұлды, Хұтпа ұстаған молдадан кем демеңіз. Біргеннің жүрген жері бәрі жарық, Жоламас кем кетіктік оған айып. Бұларды айту бізден, ұстау – сізден, Ыңғайлы, үлгі аларлық тұрсаң лайық - деп айтқандай ел ішінде іріткі салып бірлігімізге қауып төндіретін керітартпа ағымдардан сақтанайық ағайын.

Саран мешіт алқасы