Иә, қазіргі қоғамда отан отбасынан басталады дегендей, бала тәрбиесі қоғамның ең өзекті мәселесіне айналып отыр. Соған байланысты қазір мешіт имамдары имандылықты тек мешітте ғана емес, мектептерде, оқу орындарында өткізуді әдетке айналдырды десек артық айтқанымыз емес. Дегенмен қазіргі кезде дәстүрлі дінімізбен қатар ел арасына іріткі салатын жат ағымдардың да көбейіп кеткені анық жағдай. Соның салдарынан кейбір ата-аналар балаларын ғибадат үйіне, мешіттерге жіберуге қорқатын болды. Сондықтанда имамдар мектеп әкімдігімен келісе отырып, оқушыларды мешітке, имандылыққа тарту мақсатында игі шаралар ұйымдастыруда. Сол себепті, Ақтау кентінің молдасы мамырдың 14-нші жұлдызында мектеп оқушыларымен кездесіп, оларға Алланың бірлігі, барлығы жайында айта келе, иманды болу, ата-анаға құрмет көрсету адамдық борышымыз, құлдық парызымыз екендігін ашық айтып балаларға түсіндірді. Бұдан басқа мешіт Алланың үйі, келген адамдарға имандылықты, тәлім-тәрбие беретін, Аллаға құлшылық ететін қасиетті орын екенін айтып түсіндірді. Балаларға дін жайында білгілерің келсе, көшеде жүрген намаз оқимын кел мен үйретейін деген адамдардан аулақ болып, имандылықты тек мешіттерден немесе мешіт жанында болған діни сауат ашу курстарында сабақ беретін арнайы ұстаздардан ғана білім алу керектігін ашып айтты.