Ержан қажы МАЛҒАЖЫҰЛЫ,Қазақстан мұсылмандары діни басқармасының төрағасы,
Бас мүфти[/caption]
Аса қамқор ерекше мейірімді Алланың атымен бастаймын!
2014 жылдың басында Қазақстан мұсылмандары діни басқармасында төралқа мәжілісі өтті. Облыстар мен өңірлердегі өкіл имамдардың есебі тыңдалды. Жақсы осынау ізгі жұмыс жасағандарға алғыс жарияланды. Сауабы да жауапкершілігі де аса мол қызметті бүгінгі өскелең талап деңгейіне сай еңсере алмаған бірқатары ескерту де алды. Үш күнге созылған мәжілісте үш мәселеге ерекше назар аударылды. Ортақ ойдан, талқылаудан туған үш мәселе жылдың басты жұмыс жоспарына енді. Сол үш мәселенің мәні мен маңызына тоқталайын.
1. Көркем уағыз. Бір беделді басылымға берген сұхбатымда: «Біздің күшіміз – уағызда», – деген едім. Абай атамыз: «Сөз түзелді, тыңдаушы сен де түзел», - демеп пе еді? Насихат – тәрбиенің басты тірегі. Адамды көркем уағыз арқылы жөнге салуға болады. Керісінше, бір ауыз сөзбен үмітсіздікке ұрындырып, жүрегін қатайту да қиын емес. Сондықтан біз бүкіл мешіт қызметкерлеріне: «Насихат жетпеген жер, ақпарат алмаған адам қалмасын», – деген міндет арттық. «Маңдайы терлемегеннің қазаны қайнамас», – дейді дана халқымыз. Аллаға шүкір, жұмыла көтерген жұмыс нәтижесін бере бастады. Мектеп, мәдениет үйлерінде өтіп жатқан кездесулер жүрекке – иман, көңілге – медеу сыйламақ. Кейбір облыстарда 4 күнде 40 кездесу өтіп жатыр. Бізге сан да, сапа да маңызды. Діни басқарма жанынан құрылған ақпараттық-насихат тобы біз күткен межеден көрінуі тиіс.
2. Жат ағымдағы жастармен жұмыс. Бұл да мүфтияттың үлкен істерінің бірі. Діннің насихаты даналықпен көркейеді. Жұмсақтық, кішіпейілдік, ізеттілік, қарапайымдылық, мейірімділік, т.б. – пенденің жүрегін баурайтын қасиеттер. Әдеп, жылы шырай таныту – өзара қарым-қатынастың тамаша үлгісі. Біз осындай көркем мінез арқылы қатайған жүректерді жібітуге тиіспіз. «Жылы-жылы сөйлесең жылан інінен шығады, қатты-қатты сөйлесең мұсылман діннен шығады», - демей ме? Мұны баршамыз жадымызда ұдайы сақтауымыз керек. Шынайы ықылас пен атқарылған қызметтің нәтижесі шығар, жат ағымның жетегінде кеткен жастарымыздың бірқатары Әбу Ханифа мәзһабымен қайта қауышуда. Пайғамбарымыз (с.ғ.с.): «Мейірім көрсетпегенге мейірім көрсетілмейді», - деген. «Ерім дейтін ел болмаса, елім дейтін ер қайдан шықсын?!». Ахаңның (Ахмет Байтұрсынұлы) осы сөзін қаперге алуымыз қажет. Әркімді әр ағымға «байлап» қою тек ауызбен айтуға оңай. Оны орта жолды ұстануға шақыру, оған қарай қадам жасау басқа әңгіме. Түсінбеушілікпен біреулер-дің діни ұстанымы мен көзқарасынан әсер алып, ықпалында кеткен адамдармен кейде сағаттап сұхбат құруға тура келеді. Табандылықпен жүйелі атқарылған іс қана өз нәтижесін бермек.
Мына бір оқиғаны естіп сүйсініп қалғанымыз бар. Бұл бір имамның басынан өткен оқиға. Әлгі имам өмірден әбден қажыған, туысқандарынан үміт үзген бір ақсақалмен пойызда танысады. Жол бойы күні-түні шалдың қызметін жасапты. Ас-суын әзірлеген, төсегін салып берген, арасында уағызын да айтқан. Мұндай қамқорлықты, тіпті өз перзенті мен туысқандарынан да көрмеген қарт: «Сен өзі қандай адамсың? Маған неге әкең секілді қарайсың?» - деп таң қалыпты. Имамның мұндай көркем амалына риза болған атамыз: «Суретіңді берші, үйге іліп қояйын. Келген туысқандарыма: «Осындай жомарт, ақкөңіл адамдар да бар екен» деп айтам» деген көрінеді.Иә, кейде адамды разы етіп, осылай таңғалдыру үшін бүкіл ғұмырыңды сарп етесің, кейде аз ғана амалдың өзі-ақ жеткілікті.
3. Қайырымдылық. Ата-ананың үміт-арманы баласымен бірге жасайды. Сол себепті олардың бар тілеуі перзенттерінің амандығы. Ең игі тілектері: «Бала-шағаның алдында дүние салып, солардан топырақ бұйырса», - дейді. Осындай ата-ананы сыйлау сәби шағыңда өзіңді олар қалай бағып-қақса, қартайғанда оларды да солай алақанға салып аялап, күту қандай ғанибет! Қазақ: «Төріңнен қарт кетпесін» деп тілеген халық. Қарттың бүгілген беліне сүйеу болу, үлкенді сыйлап, құрметтеу – ата-бабадан келе жатқан салтымыз. Пайғамбарымыз (с.ғ.с.): «Қарияларда береке бар», - деген. Жетім мен жесірге, мүгедек пен қарттарға, жалпы қамкөңіл жандарға мешіт тарапынан қайырымдылық шаралары жиі ұйымдастырылып келеді. Бұл игі шара мұнан кейін де жалғасын таба береріне сенеміз. Әр нәрсенің тірегі, діңгегі, тағаны болады. Ол сонымен де мықты. Дінімізді насихаттау жолындағы үш бағыт (көркем уағыз, жат ағымдағы жастармен жұмыс, қайырымдылық) игілікке үндейді. Алла Тағала дін қызметіндегі бауырларымызға ықылас пен ыждаһаттылықты нәсіп еткей . Әумин!
«Халал» сертификаты
Имамдарға қызметтік пәтер
Мешіт туралы