«Зекет» қорының кезекті қайырымдылық шарасы қасиетті айымыздың бірі шағбан айында «Облыстық балалар шипажайы»коммуналдық мемлекеттік кәсіпорнында жалғасты. ҚМДБ-ның Қарағанды өңірі бойынша өкілі Өмірзақ қажы Қазкенұлының тәкелей тапсырмасымен, қор директоры Бабағалиев Базарбай Ағылманұлы аталмыш мекемеге «Зекет» қорының атынан 2 үстел, 12 орындық, 33 метр көрпеге арналған мата, көлемді кілем, екі қорап тәттілер тарту етті. Дінбасымыз Ержан қажы Малғажыұлы хазіреттің міндеттеген қайырымдылық шараларын арттыру мақсатында жасаған сауапты іске қаламыздың тұрғыны Мадияр Қуанышұлы демеушілік көрсетті. Ол азамат өзінің Алла алдындағы бес парызының бірі – зекетін атап берген болатын. Базарбай Ағылманұлының зекет парызын тынымсыз насихаттау жұмысының нәтижесі осындай өрелі еңбектермен өріліп, берілген зекеттер өзінің тиісті орындарына жұмсалып келеді. Дініміз Исламда «Зекет» — көбею, өсу, берекет, тазару, аста-төк нығметтерге шүкірлік айту секілді мағыналарды қамтиды. Зекет – тек материялдық көмек беру ғана емес, ол ең алдымен мұсылманға жүктелген міндет. Хадисте: «Мал-мүліктеріңді зекетпен қорғаңдар. Ауруларыңды садақамен емдеңдер және бәле-жалаға қарсы дұға әзірлеңдер» деген. Зекет қорының қызметі толығымен ашықтық принциптеріне негізделгендіктен осындай ізгі амалдар өзгелерге өнеге болсын деген «Зекет» қорына қол ұшын созып, оның қарқынды дамуына мүмкіндігінше жәрдем етіп жүрген мұсылман қауымына Алла тағала разы болсын деген ниет білдіреміз. Нағыз қажетті көмекті көрсеткен зекет қорының атына және осыған қамқорлық көрсеткен азаматқа мекеме басшылары өз разылықтарын алғыс хатпен білдірді.