Алматыда Қазақтың спорт және туризм академиясының 70 жылдық мерейтойына және Халық Қаһарманы Қайрат Рұсқылбековты еске алуға арналған бокстан студенттер арасында халықаралық турнир өтті. Дәстүрлі XIV халықаралық жарысқа Қазақстан мұсылмандары діни басқармасы төрағасының орынбасары, наиб мүфти Серікбай қажы Ораз, олимпиада чемпионы Ермахан Ибраимов, т.б. спорт шеберлері қатысты.

Шаршы алаңда наиб мүфти Серікбай қажы Сатыбалдыұлы қаһарман Қайраттың рухына Құран аятын бағыштап, Отанды сүюдің имандылықтан бастау алатынын айтты.

«Дені сау адамның қоғамға тигізер пайдасы мол. Ал осы нәрсе имандылықпен ұштасса, онда елдің игілігі артады. Иманды адам күшті, жігерлі болмақ. Жігерлі жан халыққа қызмет етуде жалқаулық танытпайды. Салауатты өмір салтын Қазақстан мұсылмандары діни басқармасы да насихаттап келеді. Жуырда Бас мүфти Ержан қажы Малғажыұлының бастамасымен жастар арасында күрестен республикалық жарыс өткенін білесіздер. Біздің де мақсатымыз – дені сау әрі иманды ұрпақ сабақтастығын қалыптастыру», – деді Серікбай қажы Ораз.

www.muftyat.kz