Өкіл имам Өмірзақ қажының тапсырмасының негізінде ұйымдастырылған №1-мешіт жанындағы діни сауат ашу курсындағы балаларға көңілді демалыстар өткізілуде. Сабақ арасындағы үзілісте дінбасымыз Ержан қажы Малғажыұлы хазіреттің «Дін мен дәстүр жылы» деп жариялауына байланысты ұлттық ойындарды балалар жадында жаңғырту үшін «арқан тарту, асық ату, жұмбақ жасыру, батаны жатқа айтудан жарысу» секілді ойындар өтіп жатыр. Балалардың қызығын бірге бөлісу үшін имамдар мен мешіт ақсақалдары да атсалысып қояды. Жас кезінде көрген, оқыған, тамашалаған жайттар санада қалықтап қоятыны бар. Сол себепті балалар жексенбі күні қала орталығындағы облыстық мұражайды аралап, егемен еліміздің тарихи жәдігерлерімен танысты. Діни сауат ашу курсында даярланған бағдарлама бойынша балалар имандылық негіздегі мультфильмдерді де тамашалайды. Бас имам Орманбет қажы Болатұлы балаларды алдағы уақытта қасиетті рамазан айының қарсаңында қойнауы тұнып тұрған табиғатқа бай Қарқаралы ауданына демалысқа апарып, халқымыздың мақтан тұтар тұлғасы «Құнанбай қажы» мешітіне зиярат жасауды жоспарлап қойды.

Қарағанды қалалық №1-мешітінің баспасөз қызметі