«Тәрбие басы–тал бесік» демекші, келер ұрпақтың тәрбиесіне бүлдіршін күнінен көңіл бөлінуі қажет. Баланың көңілі далада, сол себепті жазғы сауат ашу курсы ойын ойнатып, қызықтыра отырып, тәрбие мен білімнен сусындататын орынның нағыз өзі. ҚМДБ-ның төрағасы, Бас мүфти Ержан қажы Малғажыұлы хазіреттің бастамасымен еліміздің барлық мешіттерінде оқушыларға арналған жазғы сауат ашу курстары ашылып, жемісті еңбек етіп келе жатыр. Осы орайда, ҚМДБ-ның Қарағанды өңірі бойынша өкілі Өмірзақ қажы Қазкенұлының тапсырмасымен Қарағанды облыстық орталық мешітінде оқушылардың жазғы сауат ашу курсы өз жұмысын бастады. Маусым айында өтетін сауат ашу курсына 6-15 жас шамасындағы ұл мен қыз балалар қабылданды. Жазғы сауат ашу курсында жас ұрпаққа Құран әліппесімен таныстырып, түрлі дұғалар мен сүрелер жаттауға көмектеседі. Балаларды тек оқытып қана қоймай, ауқаттандырып, түрлі қызықты ойындар жүргізілетін болады. Бұйыртса, осы маусыммен шектеліп қана қоймай, алдағы уақытта бірнеше мәрте өткізілмекші.

Қарағанды облыстық орталық мешіттің баспасөз қызметі