Қарағанды облыстық орталық мешітінің ұжымы әлемді күлкісімен тербеткен сәбилерге ізгі шаралар ұйымдастырып, риясыз алғыс пен Алланың ырзалығына бөленді. Бұл игі шараға жазғы сауат ашу курсына жиналған бүлдіршіндер мен Шет ауданынан арнайы Алланың үйі саналатын облыстық мешітіне балалар келіп қатысты. Олар ҚМДБ-ның Қарағанды өңірі бойынша Бекқожа Өмірзақ қажы Қазкенұлының тікелей тапсырмасымен ұйымдастырылған, үрлемелі батутта еріксіз секіріп ойнап, құмарлана мәз болысып, жүздері шаттықтан бал-бұл жанды. Кезекке тұрып, тәртіппен ойнап, кеуделері қуанышқа толған сәбилердің күлкісі ата – аналарының, ата – әжелерінің төбесін көкке жеткізді. Иә, қазір көшелердегі және аттракциондардағы батуттарға бара қалсаңыз 15 минут ойнау үшін 200 теңге төлейсіз. Бұған барып, өз балаларын ойнатуға біреулердің жағдайы келеді, ал біреулердің жағдайы келе бермейді. Мұны жақсы түсінген балалар тегін ойын алаңында құлшына ойнап, қайырымдылық шарасын ұйымдастырушыларға қайта – қайта шексіз алғыстарын айтты. Шара барысында қасиетті Рамазан айы жайында насихаттар, уағыздар айтып, Пайғамбарымыздың (с.ғ.с.) өсиеттерін таратып, имандылыққа шақырды. Уағыздан сусындаған балалар, Жалпы және жастар ісі бөлімінің өкілі, Қарағанды облыстық орталық мешітінің найб имамы Жақия Мерей ұйымдастыруымен, хайуанаттар бағына барып жан-жануарларды тамашалады. Бұдан кейін ойыннан рахат алып, айызы қанған балаларға балмұздақ таратылып, әбден қуанышқа бөледі. Өз перзенттеріне жасалып жатқан осыншама қамқорлық пен қайырымдылыққа сүйсінгендей, ата – аналар рахметін білдіріп, облыс мешітінің имамдарын алғыстармен жаудырды.