Ұлы Жаратушымыз Алла Тағала Құран кәрімде Бақара сүресінің 160-шы аятында: «Кімде-кім бір жақсылық жасаса, оның сыйын он есе қылып беремін»,- дейді. Донор латынның (donare) сыйлау деген cөзінен шыққан. Донор өз қанын сыйға тартып, адамға өмір сыйлаған адам.Қан тапсырудың организмге ешқандай зияны жоқ. Қан орталығында қан алу қызметі тек қана біркелкі контейнерлер арқылы жүргізіледі. Адам организімінің үлкен компенсаторлық  мүмкіндіктері бар, ол жоғалтқан клетка элементтерін жылдам қалпына келтіреді. Қан тапсыру пайдалы,ерте кезде адамдар көп ауруды қан ағызу арқылы емдеген, ал әйел адамдарда қан бөліну, организмнің жұмыс жасауының бір бөлігі болып табылады. Өкінішке орай бүгінде донорлардың жетіспеушілігінен көптеген адам зардабын шегіп отыр.Осыған орай ҚМДБ-ның Қарағанды өңірі бойынша өкілі Бекқожа Өмірзақ қажы Қазкенұлының тапсырмасымен, Қарағанды облыстық қан тапсыру орталығы мен Қарағанды облыстық орталық мешітінің бірлесе ұйымдастыруымен "Өмірге үміт сыйла" атты қан тапсыру акциясы өтті. Шараның мақсаты қала халқы мен мешіт жамағатының қанға мұқтаж адамдарға қол ұшын беруіне ұйытқы болу. Донор болуға 18 жастан жоғары, дені-қаны сау адамдар қатысты. Бас имам Өмірзақ қажы Қазкенұлы бастаған Қарағанды облыстық орталық мешітінің ұжымы да кезекпен қан тапсырды. Донорларға қан тапсырғаннан соң шәй, шырын беріліп, тәтті үлестірілді! Таңертеңгі 9-дан бастап 16-30-ға дейін жалғасқан акциядан соң Қарағанды облыстық қан тапсыру орталығының қызметкерлеріне мешіт ұжымы шексіз алғысын білдірді. Қонақжайлығымызға сай дастархан басына шақырып, сыйлықтар таратылды.

Тотия Енсебаева Қарағанды облыстық орталық мешітінің баспасөз қызметі