Он екі айдың сұлтаны болған, шапағаты асып-тасыған қасиетті рамазан айында бұқара қауым өздерінің Алла алдындағы міндеттеріне адалдық танытып, ауыз бекітумен қатар, күнделікті кездескен сансыз сауалдарына жауап іздейтіні белгілі. ҚМДБ-сы жүктеген тиісті тапсырманың аясында және өкіл имам Өмірзақ қажының рамазан айына қастысты іс-шараларды жүйелі атқаруға байланысты бекіткен міндеттерін орындау барысында №1-мешіттің діни қызметкерлерімен қатар қосалқы көмекшілер де тартылды. Оның қатарына «Астана» медресесінің І-курс студенті Аманов Ақжігіт, мешіт ақсақалдарының алқа мүшесі Төлеуов Бүркітбай, кітапхана қызметкері Қорабаева Қарлығаш топтастырылды. Қыз-келіншектерге қатысты сауалдарына толыққанды жауап алу үшін кітапхана бөлмесі жұмыс істеп тұр. Телефон арқылы келетін сауалдарға да уақытылы жауаптар берілуде. Кезек күттірмес үшін мешіт ақсақалдары да алғашқы ораза ұстаушылармен кеңес өткізіп тұрады. Бірігіп атқарылған істің берекесі мол болады деген қағидаға сай атқарылып жатқан іс-шараларды бас имам Орманбет қажы өз бақылауына алған.