«Нұр» мешіті қаламыздағы мектеп алды лагерьлерде демалып жатқан балаларға Ораза қарсаңында тағы бір қуаныш сыйлады. Жазды көңілді өткізіп жатқан бүлдіршіндер мешітте арнайы ұйымдастырылған батут ойын құрылғысында бірнеше уақыт көңіл көтеріп, құмары қанғанша ойнады. Балаларға мешіттің Бас имамы Қ.Құмарұлы Қасиетті Рамазан айы, Ораза жайлы, сондай –ақ Пайғамбарымыз Мұхаммедтің (с.ғ.с.) өнегелі өмірінен, өсиеттерінен жақсы әңгімелер мен насихаттар айтты. Артынша бүлдіршіндерге жомарт азамат Сұлтан Ерлан демеушілік танытып, балмұздақтарды тегін таратты. Жыл сайын Ораза айында үлкен – кішіге қайырымдылық жасап, ізет – құрмет көрсететін қалалық мешітіміздің абыройы күн сайын артып келеді. Әрине, мектеп алды лагерьлерде демалып жатқан балалардың қатарында аз қамтамасыз етілген отбасылардың балалары басым. Лагерь осы санатқа жатқызылатын жанұялардың перзенттеріне қызмет көрсетеді. Тегін балмұздақ жеп, батутта ойнап, ерекше көңіл көтерген 20 – дан астам бүлдіршін қайырымды жандарға шексіз алғысын жаудырды.