Қарағанды облыстық орталық мешітінен бастау алған «Мектепке жол» қайырымдылық акциясы қалалық №1-мешітте жалғасты. Өкіл имам Өмірзақ қажы Қазкенұлының дәстүрге айналған бастамасын жалғастырған бас имам Орманбет қажы Болатұлы жүз балаға арнап мектеп сөмкелері мен оқуға қажетті құрал-жабдықтарды үлестірді. Осы мешіттен тұрақты көмек көрсетіліп тұратын көпбалалы, әлеуметтік аз қамтылған отбасылардың балаларына қайырымдылық көмек көрсеткен бас имам қасиетті жұма күнінде мешітте балалар мен ата-аналарына білімнің артықшылықтары жайында уағыз айтты. Білімді, парасатты, қайырымды, салауатты болуға шақырып еліміздің болашақ жастарына бақыт тілеп ақ батасын берді.